Սիրիական փախստականների քանակը տարվա վերջին կհասնի 700 հազարի

Կառավարական զորքերը և ապստամբները պատրաստվում են վճռական մարտի Հալեպում՝ Սիրիայի երկրորդ կարևոր քաղաքում, որտեղ մարտերը չեն դադարում արդեն մի քանի ամիս. հայտնում է MIGnews.com-ը։

Չորեքշաբթի՝ սեպտեմբերի 26-ին, զոհվել է նվազագույնը 305 մարդ, որոնցից 200-ը՝ խաղաղ քաղաքացիներ։ Հինգշաբթի արնահեղության հետևանքով 59 մարդ է զոհվել։

ՄԱԿ-ի տվյալներով՝ սիրիական փախստականների քանակը տարվա վերջին կարող է հասնել 700.000-ի։ Դա գրեթե չորս անգամ շատ է, քան նախորդող կանխատեսումները։

Վերջին 18 ամիսների ընթացքում ավելի քան 294 հազար փախստական է լքել Սիրիան։ Հիմա նրանք գտնվում են հարևան չորս պետություններում՝ Հորդանանում, Լիբանանում, Իրաքում և Թուրքիայում։

5-6 հազար փախստականներ գտնվում են հյուսիսային Աֆրիկայի տարբեր շրջաններում, հիմնականում՝ Եգիպտոսում, մինչդեռ մնացած մասը շարժվել է դեպի հարավային Եվրոպա՝ մասնավորապես՝ Կիպրոս և Հունաստան։

ՄԱԿ-ի գործակալությունները և մարդասիրական օգնություն ցույց տվող գործընկերները 487.9 միլիոն դոլարի ֆինանսական աջակցություն են ցույց տվել։