ԿԲ նախագահը մերկացրեց Փաշինյանի կեղծ խոստումները

ՀՀ կենտրոնական բանկի կանխատեսումների համաձայն՝ 2022 թվականին տնտեսական աճը կկազմի 5,3%, այս մասին հայտնել է ԿԲ նախագահ Մարտին Գալստյանը: Հիշեցնենք, որ էկոնոմիկայի նախարար Վահան Քերոբյանը դեռևս այս տարի խոստանում էր երկնիշ տնտեսական աճ ապահովել, ձախողելու դեպքում նա վստահեցնում էր հրաժարական կներկայացնի, և չնայած նրան, որ ՀՀ տնտեսությունը ոչ միայն երկնիշ, այլ ընդհանրապես աճից շատ հեռու է՝ Քերոբյանը հետ կանգնեց տված խոստումից:

Հաջորդ տարվա համար կառավարության ներկայացրած ծրագիրն էլ ոչ պակաս հավակնոտ է: Ծրագրի կնաքահայրն էլ, ինչպես գիտենք, անձամբ վարչապետ Փաշինյանն է: Փաշինյանը կառավարության նիստում և ԱԺ-ում հանդիսավոր կերպով խոստանում է խթանել տնտեսությունը 2022-ին և երկնիշ աճ ապահովել այս սեկտորում:

Սակայն արդյո՞ք լուրջ աճ կարելի է համարել ԿԲ նախագահի հնչեցրած՝ 5,3%-ը: Այս ցուցանիշը ցածր է անգամ Փաշինյանի կողմից այդքան փնովված նախկին իշխանությունների օրոք արձանագրած աճից: Ըստ էության՝ Մարտին Գալստյանը սահմանում է Նիկոլ Փաշինյանի հաջորդ տարվա տնտեսական ձեռքբերումների «մաքսիմումը», հասարակությանն էլ հուշելով, որ վարչապետը, մեղմ ասած, անկեղծ չէ՝ իր խոստումներում:

Ըստ էության՝ Նիկոլ Փաշինյանն իր տնտեսական հաշվարկներում այնքան է կտրվել իրականությունից, որ նրան ռացիոնալության դաշտ են վերադարձնում և տնտեսագիտական լիկբեզ են անում արդեն սեփական թիմակիցները՝ ցույց տալով, որ պոպուլիստական հայտարարությունները այլևս հալած յուղի պես չեն անցնում և իրենց տակ պետք է հաշվարկ ունենան: 

Իր այս կանխատեսմամբ Գալստյանը մեկ անգամ ևս ապացուցեց, որ Փաշինյանի տնտեսական հաշվարկները որպես կանոն մերկապարանոց են լինում, իսկ տնտեսական պլանավորումը միանշանակ Փաշինյանի ուժեղ կողմերից չէ: Եվ այդ անարդյունավետության մասին խոսում է ոչ թե շարքային քաղաքացին, այլ երկրի ԿԲ նախագահը: Բնական է, որ Գալստյանը իր այս կանխատեսումով նաև ինքն իրեն «ստրախովկա» է անում՝ 2022-ին համար կառավարության անդամների հնչեցրած և ապագայում չկատարվելիք տնտեսական իղձերի, այլ կերպ ասած՝ Նիկոլ Փաշինյանի հնչեցրած կեղծ խոստումների համար: ԿԲ նախագահը թերևս լավ է սերտել այն դասը, որ Փաշինյանը սովոր չէ ընդունել սեփական սխալները և բացթողումները և նրա ձեռագիրն է մշտապես «քավության նոխազներ» գտնել: Անգամ եթե վերջինները հենց իր թիմակիցներն են: Այս հանգամանքը քաջ իմանալով՝ Գալստյանը հենց այսօրվանից մատնացույց  է անում՝ եկող տարվա տնտեսական ֆիասկոյի գլխավոր մեղավորին և դա՝ Նիկոլ Փաշինյանն է, հանրությանը մոլորեցնող իր խոստումներով: