Մութ ամպեր` Վահան Քերոբյանի գլխին. նա հրաժարակա՞ն կտա

Այսօր ԱԺ-ում քննարկվելու են  ՀՀ հաշվեքննիչ պալատի կողմից ՀՀ էկոնոմիկայի նախարարությունում ՀՀ 2021 թվականի պետական բյուջեի վեց ամիսների կատարման հաշվեքննության արդյունքների վերաբերյալ ընթացիկ եզրակացությունները: Կառույցի կողմից, մասնավորապես, ուսումնասիրվել է կորոնավիրուսի տնտեսական հետևանքների չեզոքացման հետևանքով տրամադրված վարկերի տոկոսադրույքների սուբսիդավորման ծրագրի շրջանակներում ներկայացված հաշվետվությունը: Ըստ այդմ, հաշվետվության մեջ առկա է եղել խեղաթյուրում՝ 1.249.486 հազար դրամի չափով:

Իսկ, օրինակ, էկոնոմիկայի ոլորտում պետական քաղաքականության մշակման, ծրագրերի համակարգման եւ մոնիթորինգի ոլորտում առկա է խեղաթյուրում՝ կապված նախարարության կողմից տրված պարգեւավճարների, ինչպես նաեւ հսկողության գործընթացի թերացում՝ կապված թափուր հաստիքների հետ, մասնավորապես՝ քաղաքացիական ծառայության պաշտոնը թափուր մնալուց հետո՝ երեք ամսվա ընթացքում, պետք է հայտարարվեր մրցույթ, ինչը չի իրականացվել: Այլ անհամապատասխանություններ եւս եղել են, որոնց մասին մանրամասն ներկայացված է 57 էջից բաղկացած եզրակացության մեջ:

Ամիսներ առաջ ՀՀ հաշվեքննիչ պալատի նախագահ Յոլյանի դեմ սպառնում էին քրեական գործեր հարուցել, ինչ է թե վերջինս հանդգնել էր վեր հանել պետական կառույցներում առկա բեսպրեդելն ու խախտումները: Հիմա պարզվում է` դրանք այնքան ճչացող են, որ անգամ ԱԺ-ն է կանչել Վահան Քերոբյանին ԱԺ՝ բացատրություններ տալու: Ընդհանրապես, Քերոբյանի համար բավական ծանր շրջան է: Մեկ նա հակասում է անձամբ Նիկոլ Փաշինյանին, երբ հայտարարում է, որ բացվող երկաթուղին բացելու համար մեկ միլիարդից ավել է գումար է պետք գալու, մինչդեռ Փաշինյանը ասում էր, որ խնդիրը բավական հեշտ լուծում կգտնի և չեն լինի ֆինանսական դժվարություններ: Մեկ էլ հակադրվում է ՔՊ-ական լոբբիստներին, որոնք կոչ են անում հանել թուրքական ապրանքների ներկրման արգելքը, մինչդեռ ինքը` Քերոբյանը, հանդես է գալիս այդ սահմանափակումը երկարաձգելու նախաձեռնությամբ: Այժմ էլ նախարարին կանչում են ԱԺ՝ խախտումների համար բացատրություններ տալու: Իսկ կարո՞ղ է արդյոք այնպես պատահել, որ Վահան Քերոբյանն իսկապես հրաժարական տա մինչև տարեվերջ, սակայն, ոչ թե խոստումները չկատարելու, այլ թիմակիցների աչքի փուշը դառնալու պատճառով...