Րաֆֆի Հովհաննիսյանը պատրաստ է մեծ փոփոխություններ իրականացնել

«Ժառանգությունը» կուսակցության պատգամավոր Զարուհի Փոստանջյանը հանդես է եկել հայտարարությամբ, որտեղ մասնավորապես ասվում է. «21 տարի է անցել Սովետական Միության անկումից: Այս 21 տարիների ընթացքում մեր պատմական հայրենիքի փոքր մասում հիմնադրեցինք երկու հայկական պետություններ, որոնք իրենց Սահմանադրությունների մեջ ամրագրեցին ինքնիշխան, ժողովրդավարական, սոցիալական, իրավական պետության կարգը: Սակայն այդպես էլ մենք չկարողացանք իրագործել այն:

Ցավալի է, բայց Հայաստանը հեռու է ինքնիշխան լինելուց: Ժողովրդավարական ղեկավարման փոխարեն բռնապետական կարգեր են տիրում:

Սոցիալական արդարությանը փոխարինում է օլիգարխիայի կողմից փշրանքների տեսքով կեղծ բարեգործությունը և պետության կողմից իրականացվող անբարո սոցիալական քաղաքականությունը' խայտառակ չափի թոշակների, նպաստների և նվազագույն աշխատավարձի տեսքով:

Իրավական պետության փոխարեն գործում է համատարած անպատժելիության մթնոլորտ, իրավապահ մարմինները օգտագործվում են՝ գործադիր ղեկավարման կողմից անարդարացի, անբարո և նույն իշխանությունը վերարտադրելու նպատակով: Պարբերաբար օգտագործվում են զինված ուժերը՝ քաղաքական նպատակներով և դատական համակարգը հիմնականում սպասարկում է բռնապետության պահանջները:

Այս արատավոր համակարգը մեզ պարտադրվեց 90-ական թվականների սկզբին և այդ ժամանակվանից ի վեր մեր երազների հայրենիքում չենք կարողանում հաստատել ապրելու մեզ հարիր կարգեր:

Սա է այսօրվա իրականությունը: Շատերն են հարց հղում՝ իսկ ի՞նչ է լինելու, ո՞րն է վերջը, այլևս ոչինչ հնարավոր չէ փոխել, մենք հույսներս կորցրել ենք:

Սիրելի հայրենակիցներ,

Ուզում եմ հիշեցնել, որ մենք շատ ենք, մենք ենք մեծամասնությունը, բռնապետը մեկն է, օլիգարխները՝ մի քանի տասնյակ, հանցագործ ոստիկանները, դատախազները, ազգային անվտանգության աշխատակիցները, պետական բյուջեից յուրացումներ իրականացնող պաշտոնյանները կարող են լինել շուրջ հարյուրը:

Նրանք բոլորը արատավոր բռնապետական համակարգի գործիքներն են:

Ինչ պետք է անենք մենք՝ մեծամասնությունը.

Պարտավոր ենք ստանձնել հանձնառություն՝ վերացնել գործող արատավոր համակարգը, այն է'

Իրականացնել սահմանադրական փոփոխություններ, որն իրենից ներկայացնում է հանրաքվեի միջոցով գործող բռնապետական-նախագահական ինստիտուտի վերացում, խորհրդարանական հանրապետական կարգի հաստատում, գործադիր, օրենսդիր և դատական իշխանությունների իրական տարանջատում, գործարարության բացառում հանրային և պետական կառավարումից:

Այժմ մենք գտնվում են 2013 թվականին նախագահի պաշտոնին հավակնող մրցապայքարի փուլում: Բոլոր այն անձինք, ովքեր փորձառու բռնապետեր են և պատրաստվում են բռնապետության շարունակականությունն ապահովել, հայտնում ենք, որ առնչվելու են լուրջ դիմադրության և ընդվզման:

Մենք' մեծամասնությունը, 2013 թվականի նախագահական ընտրությունները դիտարկում ենք մեր հայրենիքում որպես մեծ փոփոխությունների սկիզբ, իսկ «Ժառանգությունը»՝ ի դեմս Րաֆֆի Հովհաննիսյանի, պատրաստ է որպես զինվոր առաջնորդել մեծ փոփոխությունների իրականացման գործընթացը»: