Ովքեր և ինչու են փափուկ բարձ դրել «հպարտ քաղաքացիների» գլխի տակ

Վերլուծական 8 Հունվար, 2022 19:53

Երեկ պարզ դարձավ, որ հնարավոր է, որ փետրվարին «Գազպրոմ Արմենիան» գազի սակագնի բարձրացման հայտ ներկայացնի։ ՀԾԿՀ նախագահ Գարեգին Բաղրամյանը չի հերքել գազի սակագնի հնարավոր բարձրացման մասին տեղեկություններն ու հավանականությունը, թեև նշել է, որ այս պահին «Գազպրոմ Արմենիայից» դեռ հայտ չեն ստացել․ մինչև հայտն ուղարկելը պետք է այդ մտադրության մասին մամուլով հաղորդագրություն տարածեն։ Ըստ Բաղրամյանի՝ սա նշանակում է, որ սահմանին գազի գինը նույնը կմնա բացարձակ արժեքով, բայց արդեն կալորիայի ճշգրտում կարող է կիրառվել, ինչը ենթադրում է, որ սահմանին 1000 խմ գազի դիմաց 165 դոլար արժեքի վրա կարող է կիրառվել գործակից՝ կախված նրանից, թե փաստացի ինչ կալորիայով գազ կմատակարարվի։

Այսինքն, կստացվի՝ Հայաստանի սպառողը իր ստացած ավելի կալորիաներով գազի համար ստիպված կլինի ավելի շատ վճարել։ Բացի դրանից, այլ գործոններ ևս կարող են ազդել գազի սակագնի բարձրացման վրա, եթե «Գազպրոմ Արմենիայի» որոշի սակագնի փոփոխության հայտ ներկայացնել։

Ուշագրավն այն է, որ ընդամենը շաբաթներ առաջ գազի սակագնի հնարավոր բարձրացման մասին խոսել է փոխվարչապետ Մհեր Գրիգորյանը և հայտարարել է, որ գազի սակագինը 2022-ին չի փոփոխվի: «Սահմանին գործող գինը 2022 թվականին կմնա անփոփոխ։ Սակայն պահպանվում են հարցեր, որոնց շուրջ պետք է պայմանավորվել։ Առաջինը՝ Հրազդանի ՋԷԿ-ի 5-րդ էներգաբլոկի հարցն է, երկրորդը՝ արժեքի մեջ գազի կալորիականությունը հաշվառելն է։ Այս հարցերի շուրջ քննարկումներ են ընթանում, սակայն գազի գինը հաստատվել է ու երկարաձգվել», — ասել է Մհեր Գրիգորյանը։

ՀԾԿՀ նախագահ Գարեգին Բաղրամյանը ևս խոսել է այս հարցի շուրջ և լրագրողների հետ զրույցում իր նախորդ պնդումներից քիչ ավելի զգուշավոր պնդումներով է հանդես եկել` հայտարարելով, որ գազի սակագինը չի բարձրանա առնվազն մինչև 2022-ի հունվարի 1-ը:

Այսինքն, ստացվում է` երկու առանցքային պաշտոնյաներ ամիսներ շարունակ փափուկ բարձ են դրել սպառողների, ասել է թե՝ հպարտ քաղաքացիների գլխի տակ` փորձելով ժամանակ ձգել, տալով հավաստիացումներ, որ գործ չենք ունենա հերթական թանկացման հետ, սակայն, արի ու տես, որ մեկ օրվա ընթացքում այդ նույն սպառողին կանգնեցնում են փաստի առաջ. պարզվում է` այժմ կան բոլոր նախադրյալները, որպեսզի գազի սակագինը բարձրանա: Իսկ թե ինչպես ստացվեց, որ երկու պաշտոնյա ամիսներ առաջ մի բան էին ասում, այսօր այլ բան՝ կիմանան, թերևս, միայն իրենք...