Ռոմանոս Պետրոսյանի «դուխը» կհերիքի՞ գնալ թիմակիցների հետևից

Ռոմանոս Պետրոսյանի ղեկավարած ՊՎԾ-ն օրերս ստուգումներ է սկսել Երևանի քաղաքապետարանում, նպատակն էլ, իհարկե, պարզ է՝ վերհանել արդեն նախկին քաղաքապետ Հայկ Մարությանի ժամանակ կատարված հավանական չարաշահումները:  Ուշագրավն այն է, որ բառացիորեն ամիսներ առաջ հաշվեքննիչ պալատը ներկայացրել էր երկու եզրկայացություն, որոնցից մեկը վերաբերվում էր Վահան Քերոբյանի կառույցում արձանագրված չարաշահումներին, մյուսը՝ դեռևս Զարուհի Բաթոյանի ժամանակ սոցապ նախարարությունում արձանագրած խախտումներին: Հաշվեքննիչ պալատի կողմից հայտնաբերված խախտումները համատարած էին հատկապես աշխատանքի եւ սոցիալական ապահովության նախարարության ծրագրերում:

Արդեն իսկ հրապարակումներ եղել են, որ մահացած մարդկանց անուններով դուրս են գրվել օրթեզներ, սայլակներ: Բայց այս համակարգում խախտումներ կան բոլոր օղակներում, մասնավորապես` մանկատներում, տուն-ինտերնատներում ու խնամքի այլ կենտրոններում: Եթե մյուս գերատեսչություններում ՀՊ-ի կատարած ուսումնասիրությունները մի քանի տասնյակ էջերում էին տեղավորվում, ապա սոցապ ոլորտում` մի քանի հարյուր էջերում: Եվ այս ոլորտում արդեն պալատի համար կասկածելի են թվացել գնումները. որոշ դեպքերում՝ ձեռք բերված ապրանքների գները, որոշ դեպքերում` քանակը:

Շատ լավ է, որ ՊՎԾ-ն և Ռոմանոս Պետրոսյանն ակտիվորեն լծվել են գործի, ի վերջո հենց դա էր պահանջում Պետրոսյանից Նիկոլ Փաշինյանը: Սակայն, օբյեկտիվությունն ապացուցելու նպատակով ՊՎԾ պետը պարտավոր է գնալ բոլոր մտահոգիչ դեպքերի հետևից և ստուգել նաև ներկա  և ոչ միայն նախկին թիմակիցների կառույցներում արձանագրված հավանական չարաշահումները, հակառակ դեպքում` տպավորություն կստեղծվի, որ ՊՎԾ-ն ընդամենը քաղաքական պատժի գործիք է և ոչ ավելին....