Վահան Քերոբյանը հավակնում է Նոբելյան մրցանակի

Էկոնոմիկայի նախարար Վահան Քերոբյանը այսօր կրկին փայլել է իր նոր, դեռևս աշխարհին անհայտ տնտեսական բանաձևերով` հայտարարելով, որ Երևանում հունվարի երեքին երեկոյան ժամերին արձանագրված խցանումը խոսում է տնտեսական ակտիվության մասին: Ինչ խոսք, այս պնդման հետ դժվար է վիճել, քանի որ ընդհանրապես դժվար է վիճել աբսուրդային և իրականության հետ որևէ աղերս չունեցող պնդման հետ: Միևնույն ժամանակ, փաստենք, որ նման փայլատակումներ Քերոբյանի մոտ վերջին շրջանում հաճախ են լինում, նա, կարծես, բացահայտել է տնտեսության իր մոդելը, իհարկե, հիմնականում իրականությունից կտրված:

Դիցուք՝ էկոնոմիկայի նախարարը հայտարարում էր, որ գնաճի պայմաններում մարդիկ ավելի լավ են ապրում, քան մեկ տարի առաջ:  Թե որն է այս տնտեսական բանաձևի հիմքն ու տրամաբանությունը՝ դժվար է կռահել, սակայն հավատանք, եթե նման պնդում անում է ոլորտի ղեկավարը:

Քերոբյանը նաև հայտարարում էր, որ Շվեյցարիան զարգացած տնտեսություն ունի, որովհետև վերջին 600 տարվա մեջ չի պատերազմել: Միևնույն ժամանակ, Քերոբյանը մոռանում է նշել շվեյցարական տնտեսության զարգացման մյուս հիմքերն էլ՝ կոռուպցիայի բացակայությունը, մենաշնորհների բացակայությունը, պետության աջակցությունը բիզնեսին, ճկուն բարեփոխումները: Պատերազմների բացակայության գործոնը վերը թվարկածի շարքում թերևս ամենավերջին գործոնն է:

Զբոսաշրջությունն էլ նախորդ տարի, ըստ Քերոբյանի, ռեկորդային աճ էր արձանագրել՝ 319 տոկոս, ինչ խոսք նման թիվը զարմացրեց անգամ զբոսաշրջության կոմիտեին, քանի որ վերջիններս էլ տեղյակ չէին, թե ինչպիսի ցնցող արդյունքներ են արձանագրել տարվա կտրվածքով:

Ընդհանուր առմամբ, պետք է նշենք, որ եթե այսպես շարունակվի՝ Վահան Քերոբյանը անշուշտ հավակնելու է տնտեսագիության Նոբելյան մրցանակի, քանի որ սեփական ձախողումներն արդարացնելիս դեռևս անհայտ տնտեսական նոր բանաձևեր է հորինում...: