Նիկոլ Փաշինյանը «ժառանգել» է Սերժ Սարգսյանի գաղտնապահությունը

Վերլուծական 20 Հունվար, 2022 20:49

Իրեն ժողովրդի վարչապետ հռչակած Նիկոլ Փաշինյանն իշխանության էր գալիս` խոստանալով այդ ժողովրդի հետ լինել բաց և թափանցիկ։ Եվ դա 2018-ին տրամաբանական էր թվում, քանի որ նույն Նիկոլ Փաշինյանը ընդդիմադիր պատգամավորի կարգավիճակում բազմիցս էր քննադատել Սերժ Սարգսյանին` կարևոր, սակայն անցանկալի տեղեկությունները հանրությունից թաքցնելու մեջ։ Սակայն, ուշագրավ է, որ այդ նույն տեղեկությունները, որոնք Փաշինյանը Սարգսյանից պահանջում էր հրապարակել, այսօր պահվում են յոթ կողպեքի հետևում և համարվում են պետական գաղտնիք։

Դիցուք` Նիկոլ Փաշինյանի ձևակերպմամբ՝ Հայաստանի բարձրագույն իշխանությանը՝ ժողովրդին, հասու չէ տեղեկատվությունն այն մասին, թե պետական բյուջեից որքան գումար է ծախսվել կառավարական առանձնատան վերանորգման համար: Այս նույն տեղեկությունը ընդդիմադիր Փաշինյանը պահանջում էր բացահայտել Սերժ Սարգսյանից և մեղադրում էր վերջինիս Գնումների մասին օրենքում նպատակաուղղված փոփոխություն անելու և հանրությունից ծախսված գումարները թաքցնելու մեջ։

Ընդդիմադիր Փաշինյանը Սերժ Սարգսյանից պահանջում էր բացահայտել, թե կարկառուն օլիգարխներից ով և որքան գումար է մուծվում ՀՀԿ-ին և ինչի վրա են ծախսվում այդ գումարները։ Կարկառուն օլիգարխները հեղափոխությունից հետո շատ արագ դարձան Փաշինյանի սրտի օլիգարխներ, սակայն, այդ ինֆորմացիան ՔՊ-ի մասով նույնպես մնաց փակ և հասարակության համար անհասանելի։

Փաշինյանը երրորդ նախագահից պահանջում էր հրապարակել ապրիլյան պատերազմի օրերին զոհվածների իրական թիվը։ 44-օրյա պատերազմից հետո Փաշինյանը և թիմը պետական գաղտնիք հռչակեցին ոչ միայն զոհվածների, այլ նաև գերեվարվածների թիվը։

Պատգամավոր Փաշինյանին հանգիստ չէին տալիս նաև այն գումարները, որոնք Սերժ Սարգսյանը ծախսում էր գործուղումների վրա։ 2018-ից հետո այդ տեղեկատվությունը հպարտ քաղաքացիներին հասանելի չէ, դրա տրամադրումը մերժվում է` հղում անելով «Գնումների մասին» ՀՀ օրենքի 15-րդ հոդվածի 2-րդ կետին: Օրենքի այս կետի համաձայն՝ ՀՀ նախագահի, ՀՀ վարչապետի և ՀՀ Ազգային ժողովի նախագահի արարողակարգային, կեցության, սննդի և տրանսպորտային սպասարկման ծախսերը համարվում են պետական գաղտնիք:

Պատգամավոր Փաշինյանը գտնում էր, որ Սերժ Սարգսյանը թաքցնում է իր եկամուտները, քանի որ վերջինիս հայտարարագիրը զբաղեցրած պաշտոնի համեմատ անչափ համեստ էր։ Ստացվում է, որ Նիկոլ Փաշինյանը նույնպես հանրությունից թաքցնում է իր իրական եկամուտները, քանի որ վարչապետի պաշտոնում չի հայտարարագրել ոչ շարժական, ոչ էլ անշարժ որևէ գույք։

Նիկոլ Փաշինյանը Սերժ Սարգսյանից պահանջում էր բաց և թափանցիկ դարձնել մեկ անձից գնումների ընթացակարգը, որպեսզի իշխանությանը մոտ կանգնած գործարարները առիթից չօգտվեն և մեկ անձից գնումների տենդերների մշտական հաղթողներ չհռչակվեն։ 2018-ից հետո մեկ անձից կատարված գնումների բացարձակ ռեկորդ էր սահմանվել, իսկ Փաշինյանն էլ ավելի հեռուն է գնացել` փակելով պետական գնումների վերաբերյալ ողջ ինֆորմացիան հպարտ քաղաքացիներից։

Ընդդիմադիր Փաշինյանը Սերժ Սարգսյանից պահանջում էր ժողովրդին ներկայացնել արցախյան հարցի կարգավորման շուրջ ընթացող բանակցությունների բոլոր մանրամասները և ժողովրդի թիկունքում քայլեր չանել։ Գալով իշխանության` Փաշինյանը խոստացավ որոշում կայացնելուց առաջ ժողովրդին հավաքել հրապարակում և նրանից քայլեր կատարելու մանդատ ստանալ, սակայն, արդյունքում ժողովուրդը ստացավ «ինչ ուզում եմ, էն էլ բանակցում եմ» սկզբունքը և իր թիկունքում կնքված կապիտուլյացիա։

Ինչպես տեսնում ենք՝ ընդդիմադիր Նիկոլ Փաշինյանը բաց և թափանցիկ աշխատելու ջատագով էր և նույնն էլ պահանջում էր երրորդ նախագահից, սակայն, վարչապետ Փաշինյանը գաղտնապահությամբ արդեն իսկ գերազանցել է Սերժ Սարգսյանին...