Անահիտ Ավանեսյանը «մոլորեցրե՞լ» է Նիկոլ Փաշինյանին

Առողջապահության նախարար Անահիտ Ավանեսյանն այսօր կայացած ամփոփիչ մամուլի ասուլիսի ընթացքում, պատասխանելով լրագրողների հարցերին, հայտարարեց, որ իրենք դեռևս չեն կարող ասել, թե որքանով են նոր սահմանափակումներն օգնելու հաղթահարել առկա առողջապահական ճգնաժամը և որքանով են նպաստելու, դրդելու քաղաքացիներին պատվաստվել:

Մինչդեռ կառավարության նիստերի ժամանակ Ավանեսյանը Նիկոլ Փաշինյանին վստահեցնում էր, որ նախարարությունը մինչ այս կամ այն սահմանափակման գնալը նախապես հաշվարկ է կատարում, անում է մոնիտորինգ ՝ հասկանալու համար այդ սահմանափակման նպատակահարմարությունը:

Ըստ էության, Նիկոլ Փաշինյանը նախարարի առջև խնդիր էր դրել մի կողմից միջոցառումներ ձեռնարկել՝ համավարակի ընթացքը կասեցնելու ուղղությամբ, մյուս կողմից այնպիսի քայլեր անել, որոնք կբալանսավորեն նաև այդ որոշումներից բխող վնասները նույն քաղաքացիների, տնտեսվարողների համար: Նախարարը վստահեցնում էր, որ իրենք գիտեն՝ որ սահմանափակումը երբ կիրառեն և ինչ արդյունավետություն ակնկալել այս կամ այն սահմանափակումից: Այժմ պարզվում է, որ մոնիտորինգային տվյալների նախարարը չի տիրապետում, իսկ դա նշանակում է, որ Փաշինյանը, մեղմ ասած, մոլորության մեջ է: Մոլորության մեջ է նա նաև պատվաստվողների ընդհանուր թվի հետ կապված, քանի որ նախարարությունից մշտապես վստահեցնում են, որ սահմանափակումները, կատարվող քայլերը նպաստում են պատվաստումների խթանմանը, սակայն, պատկերը և թվերն ինքնին վկայում են հակառակի մասին: Հայաստանում շարունակում է ծայրահեղ ցածր մնալ պատվաստված քաղաքացիների թիվը, իսկ դա խոսում է համակարգի հանդեպ ունեցած տոտալ անվստահության մասին...