Մելիքսեթ Պողոսյանը «ատամ է ցույց տալիս» Նիկոլ Փաշինյանին

Շաբաթներ առաջ մամուլը գրել էր, որ Նիկոլ Փաշինյանը պատրաստվում է մի շարք մարզպետների ազատել զբաղեցրած պաշտոններից, արդեն 2022-ին երկուսը` Արարատի և Արագածոտնի մարզպետները, հեռացան` իրենց տեղը զիջելով թիմակիցներին։ Փաշինյանի այսպես կոչված` սև ցանկում էր նաև Սյունիքի մարզպետ Մելիքսեթ Պողոսյանը, ով այդ ընթացքում որոշեց բավական երկարատև արձակուրդ վերցնել։ Սակայն, արձակուրդում գտնվելիս, ամեն դեպքում, Պողոսյանը պատասխան քայլ է արել ընդդեմ Փաշինյանի։

 

Դեկտեմբերի 20-ին մարզպետի տեղապահ փոխմարզպետ Կարո Ավանեսյանը չեղարկել է մարզպետարանի կրթության, մշակույթի եւ սպորտի վարչության պետ Մերի Գանդալյանի վերաբերյալ ավելի վաղ կայացրած «խիստ նկատողության» մասին որոշումը։ Բանն այն է, որ Գանդալյանը համարվում է Սյունիքի նախկին մարզպետ, ԱԺ «Հայաստան» խմբակցության պատգամավոր Վահե Հակոբյանի «մարդը», որը չի թաքցնում իր քաղաքական հայացքները։ Կապանի ավագանու ընտրություններից առաջ Սուրեն Պապիկյանի եւ վարչապետի գլխավոր խորհրդական Արայիկ Հարությունյանի ցուցումով՝ մարզպետարանի գլխավոր քարտուղար Էդգար Մարտիրոսյանի որոշմամբ՝ Գանդալյանի նկատմամբ ծառայողական քննություն էր սկսվել։ Փորձել են նրան վախեցնել, գուցե նաեւ՝ հնարավորության դեպքում ազատել աշխատանքից։ Քննության արդյունքում խիստ նկատողություն է հայտարարվել՝ աշխատանքից ուշանալու համար, սակայն նրա փաստաբանը բողոքարկել է որոշումը, եւ դեկտեմբերի 20-ին այն չեղարկվել է։