Ռուստամ Բադասյանը ցանկանում է «ազատվել» Շուշանիկ Ներսիսյանից

Վերլուծական 27 Հունվար, 2022 21:00

Ռուստամ Բադասյանը ցանկանում է «ազատվել» Շուշանիկ Ներսիսյանից

Արդարադատության նախկին նախարար Ռուստամ Բադասյանը Պետական եկամուտների կոմիտեի նախագահ նշանակվելուց հետո սկսել է կադրային զտումներ անել համակարգում եւ հատկապես՝ կենտրոնական ապարատում։ Բազմաթիվ մարդիկ են ազատվել աշխատանքից, քրեական գործեր են հարուցվել եւ այլն։ Շաբաթներ առաջ աշխատանքից ազատվել է «ՀԴՄ մեքենաների ներդրման գրասենյակ» ՊՈԱԿ-ի իրավաբան, փաստաբան Նարեկ Ալոյանը, ում ազատելու պատճառաբանությունը եղել է այն, որ նա, որպես իրավաբան, դատարանում ներկայացրել է «սեւերի» շահերը։

Աշխատանքից ազատվել է նաեւ ՊԵԿ երկարամյա ծառայող, մաքսային վարչության պետերից մեկը՝ Արմեն Սաֆարյանը։ Նա սոցապ նախկին նախարար Գագիկ Եգանյանի ազգականն է։ Իսկ ավելի վաղ ՊԵԿ-ից հեռացել էր նաեւ Սաթինե Գզողյանը, որը ՊԵԿ նախագահի խորհրդականն էր անցյալում։ Բադասյանին հաջողվեց փոխել նաև իր տեղակալին` Ռաֆիկ Մաշադյանին, սակայն ՊԵԿ նախագահի իրական թիրախը թերևս կառույցում անփոխարինելի դարձած Շուշանիկ Ներսիսյանն է, որից էլ Բադասյանը ցանկանում է խլել մաքսային ոլորտը։

Բնական է, որ մաքսայինում հատկապես օդային դարպասներով փոխադրվող ապրանքների մաքսազերծման հետ գործ ունենալը, այն էլ՝ փաստաթղթային վերահսկողության ֆրոնտում, համարվում է ամենայուղոտ պաշտոններից մեկն այս ոլորտում: Բացի այդ, կա նաև վերահսկող աչքի գործոնը. սահմանային անցակետերում սովորաբար ՊԵԿ ղեկավարությունն իր համար յուրային հսկողներ է ընտրում: Մինչ օրս մաքսային ոլորտում եղանակ թելադրողը ՊԵԿ փոխնախագահ Շուշանիկ Ներսիսյանն է, ով, ըստ մամուլի բազմաթիվ հրապարակումների, մաքսատներում աշխատանքի էր տեղավորում յուրայինների։ Բնականաբար, այս իրավիճակը չի կարող բավարարել Ռուստամ Բադասյանին, ով ցանկանում է ՊԵԿ-ում իշխանությունը կենտրոնացնել իր ձեռքերում։ Հենց սրանով է պայմանավորված, որ Բադասյանն իր կադրային փոփոխություններն սկսել է մաքսային վարչության պետերից։

Վերջին օրերին մամուլում կրկին սկսել են շահարկել Շուշանիկ Ներսիսյանի անունը` կապված կոռուպցիոն սկանդալների հետ, որոնցից վերջինս, ըստ մամուլի, պլստացել է։ Իր հերթին՝ մեկ ամիս է, ինչ ԱԱԾ-ն ակտիվորեն հրապարակում է տեղեկություններ` կապված ՊԵԿ-ում տարբեր կալիբրի պաշտոնյաների ձերբակալման հետ: Որպես կանոն` նրանք բոլորը մեղադրվում են կաշառք պահանջելու և ստանալու մեջ; Զուգադիպությո՞ւն է դա, թե, ամեն դեպքում, Փաշինյանի պրոտեժե համարվող Ներսիսյանի գլխին սև ամպեր են կուտակվում և ՊԵԿ-ում հեղափոխությունից հետո ամենաազդեցիկ պաշտոնյան կարող է շատ շուտով հեռանալ 2018-ից զբաղեցրած պաշտոնից...