Գտել ենք հոդված, բայց փաստ չենք գտել. Վարդան Օսկանյան

Ազգային ժողովի այսօրվա նիստում ընդգրկված է ԲՀԿ-ական պատգամավոր  Վարդան Օսկանյանին անձեռնմխելիությունից զրկելու հարցը:

«Փող կա, բողոք չկա, սա փոթորիկ է ոչ թե մի բաժակ ջրի մեջ, ես կարծում եմ, այլ մատնոցի մեջ: Մեր երկրի խնդիրները թողած՝ այս հարցերով պիտի զբաղվե՞նք, սա՞ են մեր խնդիրները: Տասը տարվա արտգործնախարարին դրել եք այստեղ, սրանով ենք զբաղվում: Մենք գործում ենք ստալինյան մեթոդներով՝ մարդ լինի, հոդված կգտնենք: Գտել ենք հոդված, բայց փաստ չենք գտել»,- քիչ առաջ խորհրդարանում հայտարարեց ԲՀԿ-ական պատգամավոր Վարդան Օսկանյանը՝ ներկայացնելով իր հակափաստարկները ՀՀ գլխավոր դատախազի միջնորդագրում ներկայացված հիմնավորումներին:

Վարդան Օսկանյանն այնուհետեւ ներկայացրեց իր կենսագրականը։ Նա հայտարարեց, որ Օսկանյանները չորս սերունդ զբաղվում են ոսկերչությամբ և ադամանդագործությամբ և իր մեծ ընտանիքը որոշակի նյութական միջոցներ է կուտակել, որն իրեն թույլ է տալիս թողնել իր տունն ու գործը ԱՄՆ-ում և մշտապես բանակություն հաստատել հայրենիքում: 

«Ես որևէ բիզնես չեմ ունեցել։ Իմ աչքը կուշտ է»,– ասաց Վարդան Օսկանյանը։

«Ես Հայաստանից փող չեմ տարել, ես այս երկրին պարտք ու վարկեր չեմ բերել, ես ատկատներից չեմ օգտվել և այս երկրին միայն դրամական օգնություն եմ բերել և շարունակում եմ բերել։ Խոսքը միայն Հանթսմանների մասին չէ, այլ բազմաթիվ ներդրումների և գրանտների մասին»,-շարունակեց Վարդան Օսկանյանը։

«Ես գումար ունեցել եմ, եթե ես գումար եմ ծախսել, ինչո՞ւ է ասվում, թե ծախսել եմ Հանթսմանի գումարը, ես իմ գումարներն  եմ ծախսել»,- ասաց Վարդան Օսկանյանը:

Օսկանյանը նաև նշեց, որ «Սիվիլիթաս»-ը հարուստ կազմակերպություն է, քանի որ բոլորը հավատում, վստահում և գումարներ են փոխանցում կազմակերպությանը: