ՔՊ-ական պատգամավորներն օլիգարխների շահերի պաշտպա՞ն

Երեկ ԱԺ տնտեսական հարցերի մշտական հանձնաժողովի նիստում տարածքային կառավարման եւ ենթակառուցվածքների նախարարի տեղակալ Նարեկ Տերյանը ներկայացնում էր վարչական իրավախախտումների վերաբերյալ Հայաստանի Հանրապետության օրենսգրքում լրացում եւ փոփոխություններ կատարելու մասին նախագիծ, որով առաջարկվում է հեղուկ վառելիքի, սեղմված բնական կամ հեղուկացված նավթային գազերի մանրածախ առեւտրի կետերում առկա լիցքավորման վառելիքաբաշխիչ աշտարակների Հայաստանի Հանրապետության կառավարության կողմից սահմանված պահանջներին համապատասխանող էլեկտրոնային «Կարգաբերման ռեժիմ»-ի ռեգիստրով կահավորված չլինելը՝ առաջացնում է տուգանքի նշանակում` սահմանված նվազագույն աշխատավարձի երեքհարյուրապատիկի չափով:

Հովիկ Աղազարյանն էլ հանդես եկավ խիստ «հումանիստական»  առաջարկով, որ պետք է տուգանել թերակշռում իրականացնող տնտեսվարողներին եւ այնպես տուգանել, որ գիշերները ահից չքնեն։ Բայց առաջարկվող փոփոխությունները թերևս, ըստ պատգամավորի, չափից մեծ պատիժ կլինեն տնտեսվարողների համար:  Իսկ ՔՊ-ական մեկ այլ պատգամավոր Գեւորգ Պապոյանն էլ ասաց, որ խորհրդարանը չի կարող հանդես գալ որպես սպառողին խաբող տնտեսվարողի շահերի պաշտպան, այլ պետք է պաշտպանի սպառողի շահերը, բայց բաներ կան, որոնք պարզաբանման եւ շտկման ենթակա են։ Ըստ էության, որոշվեց, որ նախագիծը հետ կուղարկվի և կփոփոխվի:

Որևէ մեկի համար գաղտնիք չէ, թե ովքեր են բենզինի շուկայում եղանակ ստեղծողները: Դրանք նախկին իշխանությունների հետ անմիջական կապեր ունեցող հայտնի օլիգարխներն են, որոնց ապօրինություններին վերջ տալու նպատակով էլ առաջարկվում էր կատարել այս փոփոխությունը, որն էլ ՔՊ-ական պատգամավորների թեթև ձեռքով կասեցվեց: Արդյունքում` ստացվում է, որ ՔՊ-ականները փրկեցին խոշորներին և նրանց հնարավորություն տվեցին շարունակել խաբել վարորդներին՝ հպարտ քաղաքացիներին: Տպավորություն է, որ իշխանական պատգամավորների համար առաջնայինը հենց օլիգարխների շահերն են, քան խաբված շարքային քաղաքացիներինը....