Ի՞նչ աղմկոտ սկանդալների կիզակետում են հայտնվել Երևանի փոխքաղաքապետերի թեկնածուները

Դիցուք` Ստեփան Մաչյանը նախկին փոխվարչապետ Տիգրան Ավինյանի և նրա նախկին խորհրդական Դավիթ Մանուկյանի ընկերն է։ Բացի այդ՝ Ստեփան Մաչյանը աշխատանքի և սոցիալական հարցերի նախկին (2019-2020 թթ.) նախարար Զարուհի Բաթոյանի քրոջ ամուսնու եղբայրն է։ Մաչյանը ՊՈԱԿ-ում աշխատանքի անցնելուց առաջ զբաղեցնում էր Զարուհի Բաթոյանի հասարակական հիմունքներով խորհրդականի, ապա նույն նախարարությունում՝ վարչության պետի պաշտոնները, որոշ ժամանակ էլ գլխավոր քարտուղարի պաշտոնակատար էր։ Պաշտոնին նշանակվելուց հետո ՊՈԱԿ-ում լայն թափով սկսեցին հայտնվել Մաչյանի ընկերները և ազգականները։ Այսպես, ՊՈԱԿ-ում պաշտոն է ստացել նաև նրա աներձագի կինը՝ Իզաբելլա Մուրադյանը։  Մաչյանի մանկության ընկերը Վահագն Ստեփանյանը «Ճանապարհային դեպարտամենտ» ՊՈԱԿ-ի գլխավոր տնօրենի տեղակալն է։

 

Մյուս թեկնածուն Գևորգ Սիմոնյանը համարվում է Արսեն Թորոսյանի մտերիմ ընկերը։ Նա նույնպես բավական հաճախ է հայտնվել պիկանտ պատմությունների կիզակետում։ Մամուլը գրել էր դրանցից մեկի մասին. Սիմոնյանը «Սբ Մարիամ Աստվածածին» ծննդատան տարածքում ձեւավորված կարանտինի պատասխանատուն էր հիվանդանոց մտնելիս ոստիկանը դարպասի մի դուռն է բացել, նա վրդովվել է, թե ինչու 2 դուռն էլ չես բացում, ոստիկանը, չճանաչելով, ասել է` քեզ պետք է, դու բացի։ Նա վրդովված հասել է աշխատասենյակ՝ «վառոտները» քանդելու հրաման տվել, մուտքը հսկող ոստիկանին էլ աթոռ են տվել, որ դրսում նստի:

 

Արսեն Թորոսյանի՝ նախարար նշանակվելուց հետո Սիմոնյանը նշանակվեց նրա խորհրդականը, սակայն այս պաշտոնում Սիմոնյանն աշխատեց մի քանի օր, ինչից հետո նա նշանակվեց նախարարի խորհրդատու, այս պաշտոնում Սիմոնյանն աշխատել է մոտ երկու ամիս, ապա «Նորք» ինֆեկցիոն կլինիկական հիվանդանոցում աշխատել է որպես փոխտնօրեն, այնուհետև աշխատանքի է անցել «Սուրբ Գրիգոր Լուսավորիչ» ԲԿ-ի պոլիկլինիկայում՝ տնօրեն, սակայն ԲԿ-ի տնօրենի հետ ունեցած խնդիրների պատճառով այս պաշտոնը ևս կարճ ժամանակ է զբաղեցրել: Աշխատել է նաև «Սևանի հոգեկան առողջության պահպանման» կենտրոնում, այնուհետև «Նորք Մարաշի հոգեբուժարանում»՝ փոխտնօրեն, «Հակատուբերկուլյոզային դիսպանսեր» ՓԲԸ-ում՝ կրկին փոխտնօրեն: Աշխատել է նաև Առողջապահության ազգային ինստիտուտում։

 

Վերջին պաշտոնը, որում Սիմոնյանը նշանակվել է, «Այրվածքաբանության ազգային կենտրոն»-ում ՝ որպես տնօրեն: Նա այս պաշտոնին նշանակվել է 2019թ-ի հունիսից: Իսկ պաշտոնը ստանձնելուց հետո մեծ թափով սկսել է կադրային փոփոխություններ իրականացնել կենտրոնում: Վերջինիս կարծես հրահանգված էր հարմարվել և աշխատել այդ կենտրոնում և նա ամեն ինչ հարմարեցնում էր իրեն, որպեսզի խնդիրներ չունենա, իսկ իր խոսքը լսելի ու անառարկելի լինի, դա է պատճառը, որ «անհնազանդները» աշխատանքից ազատվում են: Նրա կադրային քաղաքականությունը և կենտրոնում ծավալած գործունեությունը ևս սկանդալներից զուրկ չէր, և այժմ կենտրոնի և անձամբ Սիմոնյանի դեմ մի քանի դատական հայց կա: Սիմոնյանի հետ փոխկապակցված Մեդլայնն էլ իր հերթին առողջապահության նախարարությունից կլորիկ գումարներ է ստացել։ Ընդհանուր առմամբ, «Մեդլայն կլինիկ»-ին կորոնավիրուսի դեմ պայքարի ծառայութունների համար փոխանցվել է ավելի քան 606 մլն դրամ։ Այրվածքաբանականում աշխատելու ընթացքում էր տարածքում վեր էր խոյացել «Մեդլայն»-ի ևս մեկ մասնաշենք։

 

Երրորդ թեկնածուն արդարադատության նախկին փոխնախարար Սուրեն Գրիգորյանն է, ով պատկանում է իշխանության այսպես կոչված` սորոսական թևին և համարվում է Ռուստամ Բադասյանի մտերիմը։ Վերջինս հայտնի է ՍԴ-ում իշխանությունների դիրքորոշումը պաշտպանելու մի շարք դրվագներով և փորձերով, որոնք հիմնականում տապալվել են:

 

Ահա այսպիսի մաքուր և անբասիր քաղաքական կենսագրություն ունեցող անձանց էլ ՔՊ-ն ցանկանում է կարգել Երևան քաղաքի բարձրագույն ղեկավարություն: Իհարկե, հասկանալի է, որ վերջիններս միայն դե յուրե են լինելու փոխքաղաքապետեր, իսկ դե ֆակտո այդ կարևոր լծակները իրենց ձեռքում կենտրոնացնելու են վերը նշված կարկառուն ՔՊ-ականները, որոնց յուրայիններն էլ հանդիսանում են թեկնածուները...