ՔՊ-ից ովքե՞ր են «աչք դրել» Արամ Խաչատրյանի մարզպետական աթոռի վրա

Նիկոլ Փաշինյանի որոշմամբ Լոռու մարզպետ Արամ Խաչատրյանին արձակուրդ է տրամադրվել: Շատերի կարծիքով` արձակուրդից հետո Խաչատրյանը կհեռանա, գուցե ավելի բարձր պաշտոն կղզբաղեցնի, դա նույնպես չի բացառվում:  Իսկ մինչ այդ, գաղտնիք չէ, որ Արամ Խաչատրյանի պաշտոնին այլ հավակնորդներ ևս կան:

Մամուլը գրել էր Խաչատրյանի Վանաձորյան ՏԻՄ ֆիասկոյից հետո նրա պաշտոնը զբաղեցնելու գլխավոր հավակնորդը պատգամավոր Արփի Դավոյանն է: Ամիսներ առաջ ակտիվորեն լուրեր էին տարածվում, որ եթե Խաչատրյանն ընտրվի Վանաձորի քաղաքապետ, մարզպետի թափուր մնացած պաշտոնը բաժին կհասնի Արփի Դավոյանին: Ինքը` Դավոյանը, հերքել էր, որ պատրաստվում է զբաղեցնել մարզպետի պաշտոնը, սակայն, ինչպես ասում են՝ սա Հայաստանն է, և ոչինչ բացառել հնարավոր չէ: Խաչատրյանը չընտրվեց, սակայն, վերջինիս ձախողումն էլ ավելի է մոտեցնում Դավոյանին մարզպետի պաշտոնին:

Մյուս հավակնորդներից մեկն էլ փոխմարզպետ Գոռ Ասրյանն է, վերջինս հատկապես Խաչատրյանի ձախողումից հետո նկատելիորեն ակտիվացել է, սուբվենցիոն ծրագրերի իրականացման գործընթացին է հետևում, մարզում սպորտային միջոցառումներ է կազմակերպում, բնապահպանական խնդիրներ է լուծում: Ստվերում գտնվող Խաչատրյանի ֆոնին փոխմարզպետի նման ակտիվացումը, իհարկե, պատահական չէ, կադրային սովի պայմաններում շատ հավանական է, որ Փաշինյանի ընտրությունը ի վերջո կանգ առնի արդեն իսկ մարզում աշխատանքի փորձ ունեցող Ասրյանի վրա:

Եվ, իհարկե, երրորդ հավակնորդը Լոռու նախկին մարզպետ Անդրեյ Ղուկասյանն է, ով, կարծես, չի հաշտվում պաշտոնը լքելու մտքի հետ: Նախկին մարզպետ Անդրեյ Ղուկասյանը  ազատվում էր մարզպետարանում Խաչատրյանի կադրերից: Խաչատրյանը մինչ պատգամավոր դառնալը փոխմարզպետ էր, և մամուլը բազմիցս էր անդրադարձել վերջինիս մարզպետ դառնալու ցանկությանը: Այդ ցանկությունը Խաչատրյանն ի կատար ածեց, սակայն, այսօր հարվածի տակ է արդեն հենց ինքը: Ընդ որում, Խաչատրյանը մարզպետի պաշտոնը ստանձնելուց հետո ակտիվորեն ազատվում էր Ղուկասյանի կադրերից և այսօր Անդրեյ Ղուկասյանի գլխավոր խնդիրը մարզում իր դիրքերի վերականգնումն է:

Ի վերջո ով կհաղթի այս ստվերային մրցավազքում` դժվար է ասել, սակայն ակնհայտ է, որ մարզպետի պաշտոնը ՔՊ-ականների համար շարունակում է յուղոտ պատառ համարվել...