Փաշինյանի նոր նվերը՝ Սևանը «զավթած» օլիգարխներին

Հայաստանի կառավարությունը մտադիր է վաճառել Սևանա լճից հանվող բուսահողը։ Նկատենք, որ օգտակար հանածոների արդյունահանման աշխատանքներ կատարելիս հողի բերրի շերտի վաճառքն արգելվում է: Ըստ Շրջակա միջավայրի նախարարության՝ հողի բերրի շերտը համապատասխան նորմատիվները պահպանելու դեպքում կարող է դառնալ վաճառքի առարկա, քանի որ գոյություն ունի բերրի հողի պահանջարկ: Պարզվում է՝ մարզերում, ջերմոցային տնտեսությունների թվաքանակի աճին զուգընթաց, դրա նկատմամբ պահանջն ավելի է մեծանում: Քանի որ նախագիծը բավական լղոզված է, ապա չկա որևէ երաշխիք, որ դրա՝ օրենքի ուժ ստանալուց հետո ջրածածկ լինելու անվան տակ Սևանի շրջանից այլ հողեր չեն վաճառվի:

Վարչապետ Նիկոլ Փաշինյանը բազմիցս անդրադարձել է նախկին իշխանությունների կողմից Սևանի շրջակա հողերը բիզնես նպատակով շահագործելու հարցին, քննադատել այդ վարքագիծը և խոստացել ազատագրել Սևանը զավթիչներից ի դեմս խոշոր օլիգարխների, ովքեր գաղտնիք չէ, որ Սևանի ափին և շրջակա տարածքներում բազմաթիվ եկամտաբեր օբյեկտներ ունեն:

Տվյալ հարցին Փաշինյանը անդրադարձել է ոչ միայն ԱԺ ամբիոնից, այլ սևանցիների հետ ունեցած նախընտրական հանդիպումների ժամանակ:

Իրականում, այն պայքարը, որը Փաշինյանն ու թիմը իբր մղում էին Սևանը սեփական օբյեկտներով խեղդող օլիգարխների և նրանց օբյեկտների դեմ՝ նույնպես միֆ էր: Օլիգարխների օբյեկտները ապամոնտաժել խոստացող իշխանությունները ինչպես և սպասվում է բավարարվեցին փոքր ու միջին բիզնեսին հարվածելով, իսկ հանրությանը հայտնի մի շարք օլիգարխների օբյեկտներ մնացին անսասան՝ կառավարությունը հատուկ նրանց համար որոշակի փոփոխություններ արեց ապամոնտաժման ենթակա օբյեկտների նկարագրության մեջ, որպեսզի վերջիններիս բիզնեսը չտուժի: Իսկ վերջիններիս թվում են՝ ՀՀԿ-ական նախկին պատգամավոր Սամվել Ալեքսանյանը և նրա կինը, ՀՀԿ-ական նախկին պատգամավոր Հարություն Փամբուկյանը, ՀՀԿ-ական նախկին պատգամավոր Ռուբեն Հայրապետյանը, Ռոբերտ Քոչարյանի ավագ որդին՝ Սեդրակ Քոչարյանը և այլոք. Ահա այսպես է Նիկոլ Փաշինյանը ազատագրում Սևանը...: