ՔՊ-ի կուսակցական «քսակը» համալրողներն՝ արտոնյալներ

Կառավարությունն իր այսօրվա՝ փետրվարի 10-ի նիստում գերակա ոլորտում իրականացվող ներդրումային ծրագրի շրջանակներում մաքսատուրքից ազատելու արտոնություն տվեց «ԴՈՒՍՏՐ ՄԱՐԻԱՆՆԱ» սահմանափակ պատասխանատվությամբ ընկերությանը: Որոշման հիմնավորման մեջ նշվում է, որ «ԴՈՒՍՏՐ ՄԱՐԻԱՆՆԱ» ՍՊԸ-ի  կողմից ներմուծվող խտացրած կաթից նախատեսվում է պատրաստել կաթ՝ եվրոպական պանրի, սպիտակուցների և անյուղ փոշու արտադրության համար։ Արտադրությունն իրականացվելու է Երևան քաղաքում։

Ուշագրավն այն է, որ սույն ընկերությունը հեղափոխությունից հետո պարբերաբար նվիրատվություններ է կատարել ՔՊ-ին և վարչապետ տիկնոջ «Սիթի օֆ Սմայլ» հիմնադրամին: Դիցուք՝ այդ ամենը արտացոլված է` այստեղ և այստեղ: Ընկերության սեփականատերը Տիգրան Վարդանյանն է:

ՔՊ-ին 500 հազար դրամ է փոխանցել նաև Երևանի ՋԷԿ-ի կառուցող իտալական «Ռենկո» ընկերության տնօրենի տեղակալ Գեղամ Բակլաչևը։ Հեղափոխությունից հետո՝ 2018-ի աշնանը, ընկերությունը իշխանության հետ վերջնական համաձայնության էր եկել ՋԷԿ-ի նոր էներգաբլոկ կառուցելու հարցում։ Կառուցման աշխատանքները մեկնարկել էին 2019-ին։ 

ՔՊ-ին 5 միլիոն դրամ է նվիրաբերել նաև «Թի Էս Քնսթրաքշն» ՍՊԸ-ն, որը 2020-ի դեկտեմբերին Երևանի Շենգավիթ վարչական շրջանում երեք տարով արդյունաբերական նպատակներով ջրօգտագործման թույլտվություն է ստացել։։ «Թի էս քնսթրաքշն» ընկերությունը հիմնվել 2019-ին, բաժնետերը Երևանում գրանցված Մարիետա Ավագյանն է, իսկ «Թի էս քնսթրաքշն»-ը նրա միակ ընկերությունն է։ Սակայն, մամուլը գրել էր, որ իրականում սույն ընկերության հետևում կանգնած է բարձրաստիճան ՔՊ-ականներից մեկի եղբայրը:

Այս շարքում է հայտնի գործարար Սամվել Ալեքսանյանի հորեղբոր որդին՝ Հրաչյա Շարոյանը։ Վերջինս «Ալեքս ընդ հոլդինգ» ՍՊԸ-ի 100% բաժնետերն է։ Ուշագրավ է, որ այս ընկերությունը նաև 2019-ին Երևանի քաղաքապետարանին «Կամազներ» նվիրած ընկերությունների շարքում է։ Ալեքսանյանի հետ փոխկապակցած ընկերությունը քաղաքապետարանին նվիրել էր երեք «Կամազ» մակնիշի բեռնատար։

Հինգ միլիոն դրամ նվիրաբերողների շարքում է նաև «Ալվինա հյուրանոցային համալիր» ՓԲԸ-ն, որը Ծաղկաձորում «Ալվինա» բնակելի համալիրի (ԱԱ) վերակառուցման աշխատանքների թույլտվություն էր ստացել Շրջակա միջավայրի նախարարությունից։ 

Ինչպես տեսնում ենք՝ որոշ գործարարները ՔՊ-ին գումարներ փոխանցելուց հետո զգալիորեն բարելավել են իրենց գործերը` ստանալով լուրջ արտոնություններ կառավարությունից: