ԱՄՆ-ի նախագահի թեկնածու Ռոմնին կորցնում է վարկանիշն իր հավատակից մորմոնների շրջանում

ԱՄՆ-ի նախագահի թեկնածու Միթ Ռոմնին՝ «Հիսուս Քրիստոսի վերջին օրերի սրբերի եկեղեցու» բարձրաստիճան անդամը, ամերիկյան պատմության մեջ առաջին մորմոնն է, ով հավակնում է նախագահի պաշտոնին. գրում է Вести.ru-ն։ Մորմոններն ավանդաբար աջակցել են հանրապետականներին, այդ թվում՝ գումարով։

Սակայն կուսակցության դիրքորոշումը չափազանց պահպանողական է դարձել նույնիսկ ուղղափառ հավատացյալների համար։

Ընտրությունների մեկնարկին մեկ ամսից քիչ ավել է մնացել, իսկ Միթ Ռոմնին սկսել է կորցնել ժողովրդականությունը հավատակիցների շրջանում, ովքեր ԱՄՆ-ում 2%-ից մի փոքր պակաս են։

Մորմոնների կողմից 100 տոկոսանոց աջակցությունը Ռոմնիի համար այլևս երաշխավորված չէ։ Եվ վերջինիս՝ եկեղեցու ուղուց շեղման մասին մեղադրանքները «հավատացյալներն» ամրացնում են մորմոնների սուրբ գրքից մեջբերումներով։

«Արդյոք բոլորս աղքատ չե՞նք, արդյոք բոլորս կախված չե՞նք միևնույն էակից»,-ասում է «Հիսուս Քրիստոսի վերջին օրերի սրբերի եկեղեցու» անդամ Քրիստին Խոջեսը՝ ավելացնելով. «Ռոմնիի և՛ գործողությունները, և՛ խոսքերը չեն համապատասխանում այս ամենին»։