Արամ Մանուկյան. ՀԱԿ-ը որևէ վստահություն չի տածում դատախազի ո՛չ պրոֆեսիոնալ, ո՛չ բարոյական որակների նկատմամբ

ԱԺ-ն այսօր շարունակեց իր քառօրյան: Քառօրյան սկսվեց Վարդան Օսկանյանի գործով քննարկումներով: Ելույթով հանդես եկավ «Հայ ազգային կոնգրես» խորհրդարանական խմբակցության պատգամավոր Արամ Մանուկյանը:

Վերջինս ներկայացրեց ՀԱԿ խմբակցության դիրքորոշումը Աղվան Հովսեփյանի միջնորդագրի վերաբերյալ:

1. Նկատի ունենալով, որ Վարդան Օսկանյանին ներկայացվող մեղադրանքների մասին ՀՀ իրավապահ մարմինները տեղյակ են եղել մեկուկեսից շուրջ երկու տարի առաջ, իսկ քրեական գործը հարուցվեց 2012թ. մայիսի վերջին, այն բանից հետո, երբ Օսկանյանը սկսել էր զբաղվել ընդդիմադիր քաղաքական գործունեությամբ, այկնհայտ է, որ գործ ունենք քաղաքական պատվերի հետ՝ անկախ ներկայացված միջորդագրի իրավական հիմնավորվածությունից, կամ ոչ հիմնավորվածությունից: 

2. Սա նաև Ռոբերտ Քոչարյանի և Սերժ Սարգսյանի հիմնած հանցավոր այն պրակտիկայի դրսևորման մի նմուշ է, երբ իշխանությունները կոմպրոմատներ են հավաքում բոլոր պաշտոնյաների, քաղաքական ու հասարակական գործիչների, գործարարների վերաբերյալ՝ ոչ թե օրինականության և օրենքի առջև պատասխանատվության ապահովման, այլ իրենց նախընտրած պահին դրանք քաղաքական կամ այլ նպատակներով օգտագործելու համար։

3. Ըստ էության, դատախազն իր այս միջնորդությամբ փորձում է ամրապնդել պատգամավորների նկատմամբ իշխանությունների հրահանգով կիրառվող այն արատավոր ավանդույթը, որի նախադեպը ԱԺ չորս պատգամավորներ՝ Սասուն Միքայելյանի, Խաչատուր Սուքիասյանի, Հակոբ Հակոբյանի, Միասնիկ Մալխասյանի նկատմամբ գործադրված ապօրինի ու աղաղակող քաղաքական հետապնդումն էր։ Ի դեպ ասեմ, որ այս չորս պատգամավորների հարցով «Հայ ազգային Կոնգրես» խմբակցությունը պատրաստվում է ԱԺ-ում հանդես գալ առանձին մի նախաձեռնությամբ։

4. Եվ ընդհանրապես, նկատի ունենալով, որ ՀՀ գլխավոր դատախազ Աղվան Հովսեփյանն այն անձն է, ում անվան հետ են կապվում Հայաստանում տեղի ունեցող բոլոր հակօրինական հետապնդումները, շինծու քրեական գործերի ու մեղադրանքների հարուցումը, Հոկտեմբերի 27-ի ոճրագործության գործի տապալումը, Մարտի 1-ի 10 սպանությունների չբացահայտման և մեղավորների պարտակման փաստը, Կոնգրեսի խմբակցությունը որևէ վստահություն չի տածում դատախազի ո՛չ պրոֆեսիոնալ, ո՛չ բարոյական որակների նկատմամբ։

5. Ելներով այս ամենից՝ Հայ Ազգային Կոնգրեսի խմբակցությունը ամբողջ կազմով չի մասնակցի քվեարկությանը։

Արամ Մանուկյանը իր խոսքն ավարտելուց հետո հավելեց. «Բոլոր գողերը, հանցագործները, մեղք գործածները վերջում փորձում են եկեղեցի ու խաչ կառուցել: Պարո՛ն դատախազ փորձեք խաչ կառուցել»: