Լիցենզավորման մեջ պետք է երևա՝ ով է ներկրել և ով է սերտիֆիկացրել. Արմեն Պողոսյան

«Ստեղծվել է միջգերատեսչական հանձնաժողով, որը պայթուցիկ նյութերի վտանգի մասին կարգավորումներով է զբաղվում. կամ մեզ հայտնի չէ հանձնաժողովի կողմից արված գործը, կամ ոչինչ արված չէ։ Բայց ես կարծում եմ, եթե մեզ հայտնի չէ, ուրեմն չի արվել, որովհետև մենք շահագրգռված հետևում ենք այդ գործընթացին»։ Այսօր լրագրողների հետ հանդիպմանն ասաց սպառողների ասոցացիայի նախագահ Արմեն Պողոսյանը՝ խոսելով միջոցառումների ժամանակ օգտագործվող պայթուցիկ նյութերի վտանգի և դրանց հետևանքների մասին։

Բանախոսը նկատեց, որ հարկավոր է այս դաշտին մեծ ուշադրություն դարձնել, որպեսզի ևս մեկ անգամ չհանգենք այն խնդրին, ինչ տեղի ունեցավ Հանրապետության հրապարակում փուչիկների պայթյունով։

«Պետք է մանուկներին չվաճառել այդ պայթուցիկ նյութերը, պետք է հստակեցվի, թե մինչև որ աստիճան պետք է թույլատրվի պայթուցիկ նյութերի վաճառքը։ Բացի դրանից՝ հստակ ժամ գոյություն ունի, որից հետո արգելվում է օգտագործել այդ պայթուցիկները»։ 

Արմեն Պողոսյանի խոսքով՝ նրանք դիմել են ԱԻՆ նախարարին, որպեսզի այդ վտանգների դեմ գործառույթներ ձեռնարկվեն։

Ըստ նրա՝ հարկավոր է տարբերակել ըստ վտանգի աստիճանի, սահմանել տարածքային հասկացողություն, բնակավայրից ինչ հեռավորությամբ կարող են օգտագործել պայթուցիկ նյութեր։ Լիցենզավորման մեջ պետք երևա՝ ով է ներկրել և ով է սերտիֆիկացրել»- եզրափակեց վերջինս։