Կպատժի՞ արդյոք Նիկոլ Փաշինյանն իր հանձնարարականը չկատարած ՔՊ-ականներին

Նիկոլ Փաշինյանը կառավարության նիստերի և պաշտոնյաների հետ աշխատանքային հանդիպումների ընթացքում հաճախ է այս կամ այն պաշտոնյայի առջև դնում կոնկրետ խնդիր, հանձնարարական և սահմանում ժամանակ` այդ խնդրի լուծումը գտնելու համար:

Սակայն, ինչպես երևում է, ոչ բոլոր պաշտոնյաներն են ականջալուր լինում Փաշինյանի հանձնարարականները նշված ժամկետներում կատարելուն:

Դիցուք՝ Փաշինյանը երկու ամիս ժամանակ էր տվել քաղավիացիայի կոմիտեի նախագահ Տաթևիկ Ռևազյանին ԵՄ սև ցուցակի հետ կապված խնդիրները լուծելու համար: Այդ հանձնարարականից անցել է երկու տարի, և խնդիրը միայն խորացել է:

Գյումրի այցելելիս դեռևս 2019 թվականին փողոցաշինական աշխատանքներին ծանոթանալուց հետո Նիկոլ Փաշինյանը խիստ հանձնարարական էր տվել մարզպետ Տիգրան Պետրոսյանին և քաղաքապետ Սամվել Բալասանյանին՝ ավարտին հասցնել տվյալ աշխատանքները: Սակայն, այնուհետև անգամ Փաշինյանի ընտանեկան թերթն էր փաստել, որ վարչապետի հանձնարարականը հավուր պատշաճի չի կատարվում:

Նիկոլ Փաշինյանը կառավարության հերթական նիստին անդրադարձավ արդեն վաղուց ներկայացրած իր հանձնարարականին. «Խոսքը մեր գերատեսչությունում տեղադրվող տարբեր ապարատների մասին է՝ վճարումների, սուրճի ապարատների: Ես հանձնարարական էի տվել, որ այդ գործառույթներն իրականացվեն մրցույթներով, այսինքն՝ ուղիղ որոշումներով նման հարցերը չկարգավորվեն, որ պետական գերատեսչության համար լավագույն պայմաններով արվի: Բայց ես տեղեկանում եմ, որ այդ հանձնարարականից հետո կարծես թե դեպք ենք ունեցել, երբ որոշում ենք կայացրել և ուղիղ գնում ենք կատարել այդ ծառայության, որքան ես հասկանում եմ, որ այդ ապարատները տեղադրելու համար պետությանը ոչ մի վճարում չի արվում»: Պատասխանատուն և թերացող պաշտոնյան այս դեպքում՝ այն ժամանակ կառավարության աշխատակազմի ղեկավարի պաշտոնը զբաղեցնող էդուարդ Աղաջանյանն էր:

Դիցուք՝ դեռեւս 2020-ի դեկտեմբերի 2-ի կառավարության նիստի ժամանակ վարչապետ Նիկոլ Փաշինյանն առողջապահության նախարար Անահիտ Ավանեսյանից հետաքրքրվում էր՝ կորոնավիրուսի մահվան թվերի վիճակագրության հետ կապված եզրակացության հանգել են արդյոք, թե դեռ ոչ, քանի որ առողջապահության նախարարության ու Վիճակագրական կոմիտեի թվերի միջեւ 700-ով տարբերություն կա: Կորոնավիրուսի մահվան իրական պատկերը ներկայացնելու համար վարչապետը նախարարին մեկ ամիս ժամանակ էր տվել, սակայն մինչ օրս նորություն չկա:

Էկոնոմիկայի նախարար Վահան Քերոբյանին Նիկոլ Փաշինյանը հանձնարարել էր իրականացնել ներդրումային միջավայրի բարելավման համալիր միջոցառումներ: Սակայն, հորդացող ներդրումների բացակայությունը վկայում է այն մասին, որ վարչապետի հանձնարարականը բավարար չափով չի իրագործվել:

ՏՄՊՊՀ-ին Փաշինյանը հանձնարարել էր ստուգել՝ արդյո՞ք բենզա և գազալցակայաններում քաղաքացիներին չեն խաբում, սակայն այդ ստուգումների արդյունքների, պատժված տնտեսվարողների մասին հանրությունն այդպես էլ չտեղեկացվեց:

Նիկոլ Փաշինյանը նաև հայտարարել էր, որ բոլոր գերատեսչությունների բյուջեի կատարման մասին հաշվետվությունները ներկայացվելու են դրանց ղեկավարների մակարդակով: Սակայն, այդպես տեղի չունեցավ: 2019 թվականին աշխատանքի և սոցիալական հարցերի նախարարության հաշվետվությունը ներկայացնում է փոխնախարար Սմբատ Սաիյանը: Ասել է թե ՝ Զարուհի Բաթոյանը, ով այսօր պատգամավոր է, չէր կատարել Փաշինյանի հանձնարարականը: