ՔՊ-ական նորաթուխ քաղաքապետերը շարունակում են նախորդների «լավագույն ավանդույթները»

Վերլուծական 3 Մարտ, 2022 21:14

Հայաստանի մի շարք համայնքներում դեկտեմբերիմ տեղի ունեցած ՏԻՄ ընտրությունների արդյունքում Իջևանում և Թալինում քաղաքապետ էին ընտրվել ՔՊ-ական թեկնածուները։ Վերջիններս, պետական կառավարման համակարգում համեմատաբար նոր դեմքեր լինելով հանդերձ, չեն դավաճանում հեղափոխական իշխանությունների ավանդույթներին։

Դիցուք` Իջևանում լայն թափով ձևավորվում է կլանային կառավարում, որի կենտրոնում Իջևանի նորընտիր քաղաքապետն է` Արթուր Ճաղարյանը, ով համայնքապետարանում աշխատանքի է ընդունել բաջանաղի որդուն՝ Վաչե Վիրաբյանին։ Մարզպետ Հայկ Ղալումյանը, ում մտերիմն էլ համարվում է Ճաղարյանը, քաղաքապետարան է մտցրել նաև իր փեսայի եղբորը՝ Աշոտ Երիցյանին։ Մարզպետի բաջանաղ Դավիթ Վիրաբյանի դուստրը՝ 19-ամյա Նանե Վիրաբյանն է հայտնվում ՔՊ ավագանու ցուցակում։ Մարզպետ Հայկ Ղալումյանին, կարծես թե, չեն բավարարել բաջանաղի ստացած հեղափոխական բոուսները և արդեն ընտրված քաղաքապետ Արթուր Ճաղարյանին հրահանգել է առանց այդ էլ սուղ բյուջե ունեցող քաղաքում բացել քաղաքապետի տեղակալի երկրորդ հաստիք, որն, ըստ պտտվող լուրերի, նախատեսված է հենց բաջանաղին փոխքաղաքապետ կարգելու նպատակով։

Թալինում քաղաքապետ է ընտրվել Մարտի 1-ի գործով տուժած համարվող Սափեյան եղբայրներից Թալինի ՃՈ նախկին պետ Էդիկ Սափեյանի որդին` Տավրոս Սափեյանը։

Հիշեցնենք, որ դեռեւս 2019 թվականին մամուլում տեղեկություններ շրջանառվեցին, թե Արմավիրի մարզի Քարակերտ գյուղում տեղակայված Թալին ՋՕԸ-ի գրասենյակ են մուտք գործել ՀԱԿ-ի Սափեյան եղբայրներն իրենց որդիներով ու զենքի սպառնալիքով փորձել են իրենց կրտսեր որդուն նշանակել պետի տեղակալ: Ծեծուջարդ էր սկսվել, որին հաջորդել էին կրակոցներ: Նույն թվականի նոյեմբերի 11-ին էլ հայտնի դարձավ, որ տեղի ունեցած դեպքով հարուցվել է քրեական գործ, եւ Սափեյաններից Տավրոսը ներգրավվել է որպես կասկածյալ: Նրա նկատմամբ խափանման միջոց էր ընտրվել ստորագրություն` երկրից չհեռանալու մասին: Սափեյանն այս անգամ էլ հարցը փորձել է լուծել կրիմինալի օգնությամբ. մասնավորապես` նա քաղաքապետ է ընտրվել քրեական հեղինակություն Ռուստամ Ստեփանյանի՝ Չաղ Ռուստամի ճնշումների արդյունքում զիջած Կարեն Գրիգորյանի մեկ ձայնի շնորհիվ։

Թե ինչ խնդիրներ են այս երկու ամիսների ընթացքում լուծվել Թալինում և Իջևանում և նախընտրական շրջանում տրված որ խոստումներն են իրականություն դարձել՝ դժվար է ասել, սակայն, մի բան, ամեն դեպքում, պարզ է՝ ՔՊ-ականների` ծանոթ բարեկամներին աշխատանքով ապահովելու խոստումը անշեղորեն կատարվում է...