Ո՞վ է իրականում ղեկավարում Կոտայքի մարզը

Չնայած այն հանգամանքին, որ Ռոմանոս Պետրոսյանը շուտվանից ազատվել է Կոտայքի մարզպետի պաշտոնից, Կոտայքը Պետրոսյանից այդպես էլ ազատվել չի կարողանում: Բանն այն է, որ անգամ ստանձնելով ՊՎԾ պետի պաշտոնը` Պետրոսյանի ուշքն ու միտքը ինչպես ասում են՝ Կոտայքում է և նա ցանկանում է ամեն գնով այստեղ պահպանել իր ազդեցության լծակները:

ՏԻՄ ընտրություններից հետո  Ռոմանոս Պետրոսյանի Կոտայքի մարզը «ձեռքում» պահելու երազանքը հօդս ցնդեց: Հրազդան խոշորացված համայնքի վարչական ղեկավարներ նշանակվեցին Սասուն Միքայելյանի ընտանիքի ծանոթները: Լեռնանիստ համայնքի վարչական ղեկավար է նշանակվել Մարզպետ Նիկողոսյանը, Քաղսի համայնքում՝ Գեւորգ Գրիգորյանը: Իսկ մենք գիտենք, որ Պետրոսյանի և Միքայելյանի միջև հեղափոխությունից հետո բավական անհաշտ պայքար էր գնում Կոտայքում ազդեցությունը ընդլայնելու համար:

Սակայն, Պետրոսյանը չի հանձնվել: Մամուլը գրել էր, որ Կոտայքի մարզի Արամուս գյուղի Վ. Առաքելյանի անվան դպրոցի տնօրեն Նոնա Պողոսյանին Ռոմանոս Պետրոսյանը ցանկանում է տեղափոխել Աբովյան քաղաք եւ դարձնել Աբովյանի Ն. Վանյանի անվան թիվ 5 հիմնական դպրոցի տնօրեն։ Նոնա Պողոսյանն Արամուսի դպրոցի տնօրեն է դարձել 2019 թվականին, նրա նշանակումից հետո Արամուսի դպրոցում տեւական ժամանակ դասապրոցեսը կաթվածահար վիճակում էր, դպրոցի կոլեկտիվը չէր ցանկանում, որ նա դպրոցի տնօրեն դառնա։

Ինչ վերաբերում է Աբովյանի թիվ 5 դպրոցին, ապա դպրոցի տնօրեն Էմին Եղիազարյանի պաշտոնավարման ժամկետը լրացել է այս տարվա հոկտեմբերի 25-ին, պաշտոնակատար է նշանակվել տնօրենի տեղակալ Ռուզաննա Լալայանը, եւ տնօրենի ընտրություններ են նշանակվել դեկտեմբերի 3-ին, Նոնա Պողոսյանն էլ հայտարարել է, որ ինքը թեկնածություն է առաջադրում, սակայն հարցն այն է, որ այս դպրոցի կառավարման խորհրդի անդամներից 4-ը Ռոմանոս Պետրոսյանի մերձավորներն են:

Բացի այդ, գործող մարզպետ Ահարոն Սահակյանն էլ համարվում է Պետրոսյանի մտերիմը և շատերի կարծիքով` հենց Պետրոսյանի բարեխոսելու արդյունքում էլ վերջինս նշանակվել էր այդ պաշտոնում: Հետևաբար, կարող ենք ասել, որ չնայած դիրքերի թուլացմանը` ՊՎծ պետը դեռևս խաղի մեջ է և շարունակում է պայքարել Կոտայքում իր ազդեցության գոտիները պահպանելու և ընդլայնելու համար: