Սպանդ Նիգերիայում. Գնդակահարվել է 26 ուսանող

Ինչպես հայտնում է Նիգերիայի ոստիկանությունը, նվազագույնը 26 մարդ (հիմնականում ուսանողներ) է զոհվել պետության հյուսիսարևելյան Մուբի քաղաքի ուսանողական հանրակացարանում տեղի ունեցած կրակոցների ընթացքում. գրում է BBC-ի ռուսական ծառայությունը։

Ոստիկանության ներկայացուցիչը հայտնել է, որ ուսանողներին կանչել են անուն առ անուն։

Տեղի բնակիչների խոսքերով՝ 40 մարդ է գնդակահարվել կամ դանակահարվել։

Հարձակումը տեղի է ունեցել արմատական «Բոքո Հարամ» խմբավորման դեմ ոստիկանության գործողությունից մի քանի օր անց։

Ուսանողական շարժման պատմությունը հարուստ է նման արյունալի միջադեպերով, սակայն եթե պարզվի, որ այս դեպքը ևս կապված է ուսանողական կոնֆլիկտի հետ, ապա այն կլինի նման միջադեպերի մեջ ամենադաժանը։

Սպանվածների մեջ կան թ՛ե քրիստոնյաներ, թ՛ե մահմեդականներ։

«Բոլորը վախեցած են»,-ասել է տեղի բնակիչներից մեկը, նշելով, որ սպանդը տևել է շուրջ երկու ժամ։

Նրա խոսքերով՝ ուսանողները լքում են քաղաքը։ Իշխանությունները քաղաքում պարեկային ժամ են հայտարարել և հորդորել բնակիչներին դուրս չգալ տներից։

Համալսարանը ներկայումս փակ է։