Գարիկ Սարգսյանը Վեդիում լրջորեն «գործի է անցել». պատկան կառույցները լռում են

Վեդի խոշորացված համայնքի ղեկավարի ժամանակավոր պաշտոնակատար Գարիկ Սարգսյանն ընտրություններից մոտ մեկ ամիս առաջ բարեգործության օրեր է հայտարարել, վերջին մեկ շաբաթում նա գրեթե ամեն օր մոտ երկու տասնյակ որոշում է ստորագրել՝ համայնքի բնակիչներին դրամական օգնություն տրամադրելու մասին։ Այդ օգնությունները 10-50 հազար դրամի միջակայքում են, նախորդ օրն էլ իր հայրենի Նոր Կյանքի ու հարևան Ոսկետափի անապահով ընտանիքներին է 20-35 հազարական դրամ տրամադրել։ Տարբեր հաշվարկներով, վերջին երկու շաբաթվա ընթացքում սոցիալական աջակցության անվան տակ 5-6 մլն դրամի փող է դուրս գրվել համայնքային բյուջեից։

Հիշեցնենք, որ մարտի 27-ին Վեդիում նոր ընտրություններ կլինեն, դեկտեմբերի 5-ին Գարիկ Սարգսյանն ու ՔՊ-ն խայտառակ ցուցանիշ գրանցեցին՝ ընդդիմադիր «Հզոր համայնք» կուսակցությանը մի քանի տոկոս էր պակասում իշխանությունը վերցնելու համար, հիմա ՔՊ-ն հույս ունի նաև փող բաժանելով գնել իշխանությունը:

Սակայն, սա Գարիկ Սարգսյանի նախընտրական միակ ձեռքբերումը չէ: «Իմ հզոր համայնք» կուսակցության տարածած հաղորդագրության մեջ, մասնավորապես, ասվում է, որ Գարիկ Սարգսյանը ապօրինի որոշումներ է կայացրել և աշխատանքից ազատել է թիվ 1 և թիվ 2 մանկապարտեզների տնօրեններին, իսկ թիվ 3 մանկապարտեզի տնօրենին խիստ նկատողություն է հայտարարել, նա աշխատանքից ազատել է նաև համայնքի գեղարվեստի դպրոցի տնօրենին։

Բացի այդ՝ Սարգսյանը արագացված կարգով սկսել է ասֆալտապատել Վեդիի փողոցները և իր ֆեյսբուքյան էջում այդ առիթով շնորհակալություն է հայտնում մամուլից բոլորին քաջ հայտնի Եվրոասֆալտ ընկերությանը: 

Ինչպես հասկանում ենք՝ Գարիկ Սարգսյանը առաջին անհաջող փորձից հետո պատրաստ է վա-բանկ գնալ՝ անել հնարավորն ու անհնարինը, նույնիսկ օրենքի  շրջանակներից դուրս գործել՝ ընտրությունների երկրորդ փուլում հաջողելու և ՔՊ-ին չհիասթափեցնելու համար: Դե իսկ Սարգսյանի գործողություններով արդեն իսկ պետք է հետաքրքրված լիներ առնվազն կոռուպցիայի կանխարգելման կոմիտեն, եթե վերջինս, իհարկե, ծառայելու լիներ այն բուն նպատակին, որի համար ստեղծվել էր...: