Վահան Քերոբյանի հերթական «նվերը» Սամվել Ալեքսանյանին

Իշխանափոխությունից հետո կառավարությունը հրաժարվեց հողօգտագործողներին կամ գյուղացիական տնտեսություններին պարարտանյութերի, սերմերի, դիզվառելիքի գների սուբսիդավորման տեսքով տրամադրվող օժանդակության ծրագրերից։ Այն ժամանակ դա հիմնավորում էին այդ ծրագրերի կոռուպցիոն բնույթով։ Այժմ կառավարությունը ոչ միայն որոշել է վերադառնալ հին այսպես ասած` կոռուպցիոն մեխանիզմին, այլ մի բան էլ իր լուման է ներդրել այդ մեխանիզմի բնականոն գործունեության մեջ:

Դիցուք՝ պարարտանյութի սուբսիդավորման ծրագիրն իրականացնելու համար մատակարար կազմակերպության կամ կազմակերպությունների ընտրության համար որևէ մրցույթ չի հայտարարվել։  Այսինքն` կառավարությունը որոշել է, որ պարարտանյութի սուբսիդավորման գումարը ստանալու է ոչ թե գյուղացին, այլ այն կազմակերպությունը, որն իրականացնելու է դրա մատակարարումը։  Պետական սուբսիդիայի միջոցով գյուղացիները պարարտանյութ կարող են ձեռք բերել միայնումիայն էկոնոմիկայի նախարարության կողմից հաստատված մատակարարներից։

Ասել է թե՝ ընտրության իլյուզիա կա, ընտրություն չկա: Դեռ նախկին իշխանությունների ժամանակ մամուլը հաճախ էր գրում, որ պարարտանյութի ներկրման բիզնեսում իր լուրջ կշիռը ունի օլիգարխ Սամվել Ալեքսանյանը: Նշենք, որ այդ պահից ի վեր ոչինչ չի փոխվել: Ստացվում է՝ էկոնոմիկայի նախարարությունը գյուղացիներին պարզապես ուղղակի կախման մեջ է դնում Սամվել Ալեքսանյանից և նաև, իհարկե, մյուս խոշոր մատակարարներից, սուբսիդավորումն էլ գնալու է հենց նրանց գրպանը և ոչ թե գյուղացու: Արդյունքում տպավորություն է, որ կառավարությունը օգնում է դժվարին կացության մեջ հայտնված գյուղացուն, սական իրականում սա հերթական օգնությունն է խոշոր բիզնեսին և խոշոր օլիգարխներին...