Վահագն Արսենյանի նախընտրական խոստումները. միֆ՞, թե՞ իրականություն

Վերլուծական 16 Մարտ, 2022 14:51

Դեկտեմբերի սկզբին Ջերմուկ խոշորացված համայնքում տեղի ունեցան ՏԻՄ ընտրություններ, որոնց արդյունքում Ջերմուկի քաղաքապետ ընտրվեց նախկին ՀՀԿ-ական պատգամավոր Աշոտ Արսենյանի որդին` Վահագն Արսենյանը։ Վերջինիս համայնքապետ էին նշանակել դեռևս մինչ ընտրությունները և նա ժամանակ է ունեցել շատ ավելի հիմնավոր պատրաստվելու քարոզարշավին, հատկապես՝ ճոխ խոստումներ շռայլելու մասով։

Դեռ հոկտեմբերին՝ Արսենյանը խոստանում էր Ջերմուկը դարձնել զբոսաշրջային կենտրոն, ստեղծել նոր աշխատատեղեր և ենթակառուցվածքներ։ Անցել է երեք ամիս, սակայն, որևէ գրանցված արդյունք այս խոստումների մասով դեռևս չի նկատվում։ Փոխարենը` Արսենյանը շատ սահուն առաջ է տանում ՔՊ ծրագրերը, ի վերջո հենց ՔՊ ցուցակով էլ վերջինս քաղաքապետ է ընտրվել։ Օրինակ` Արսենյանը և Ջերմուկի ավագանին այլևս որևէ խոչընդոտ չեն ստեղծում կառավարության համար` Ամուլսարի հանքի շահագործումը վերսկսելու մասով։ Թե ինչպես է հանքի վերաբացումը նպաստելու Ջերմուկի` զբոսաշրջային կենտրոնի վերածվելուն` դժվար է ասել, համենայնդեպս հանքերի շահագործման խոստում Արսենյանը չէր տվել։ Գաղտնիք չէ, որ մինչ այս ընտրությունները, թե ՔՊ-ն, թե ինքը՝ Վահագն Արսենյանը, պնդում էին, որ Ջերմուկում առաջնայինը բնապահպանական խնդիրներն են և իրենք թույլ չեն տալու, որպեսզի բնության և զբոսաշրջային գրավչության հաշվին խոշոր հանքաարդյունաբերությունը միլիարդներ վաստակի: Այսօր տեսնում ենք, որ թույլ են տալիս, , առնվազն՝ չեն խոչընդոտում , այն էլ, նույնիսկ, նման կարևորության հարցը առանց հանրային քննարկման դնելու: Փոխարենը, հանրային քննարկման է դրվում դիցուք՝ պուրակի բարեկարգման ծրագիրը:

Ինչ վերաբերվում է ենթակառուցվածքներին, ապա այստեղ իսկապես գրանցվել է որոշակի շարժ։ Սակայն, պետք է հասկանալ, թե ով է այդ իրավիճակում ամենամեծ շահողը և շահառուն, քանի որ շինարարական աշխատանքները իրականացնում է հենց Արսենյանի ընտանիքին պատկանող Ջերմուկ Գրուպը` իր ֆինանսական միջոցներով։ Դիցուք` Ջերմուկում կկառուցվի նոր բնակելի թաղամաս՝ բաղկացած մոտ 300 բնակարանից։ Ծրագրի նախագիծը արդեն կա, իսկ կառուցապատման աշխատանքների մեկնարկը կտրվի 2022 թվականի մայիս ամսից։ Ծրագիրը իրականացվում է «Ջերմուկ Գրուպ» ընկերության կողմից։ Բացի այդ, վերանորոգվում է նաև «Ջերմուկ Գրուպ» ընկերության կողմից գնված Ջերմուկի «Գլաձոր» առողջարանը, որը, արդեն երկար տարիներ է, ինչ աշխատում է մասամբ և սեզոնային։ Այսինքն ակնհայտ է, որ ենթակառուցվածքների մասով շարժ կա, սակայն , ուշագրավ է որ կիզակետում է հենց Ջերմուկ Գրուպը:

Ինչպես տեսնում ենք` պաշտոնը ստանձնելուց ի վեր Վահագն Արսենյանի մոտ ընդամենը երկու կարևոր օրակարգ է ձևավորվել։ Առաջինը՝ ջերմուկցիներին հուսախաբ անելն է: Իսկ երկրորդ օրակարգը՝ ընտանեկան բիզնեսը հնարավորության սահմաններում,գուցե և օրենի շրջանակներում, սակայն առաջ մղելն է, ինչն էլ Վահագն Արսենյանը հաջողությամբ իրականացնում է քաղաքապետի պաշտոնում: