ՀՀ վարչապետերից ո՞վ է աչքի ընկել առավել մեծ «գաղտնապահությամբ»

Նիկոլ Փաշինյանի կառավարությունը աչքի է ընկնում իր գաղտնապահությամբ, խոսքը վերաբերվում է նիստերի օրակարգում առկա չզեկուցվող կամ գաղտնի հարցերին: Դրանք որպես կանոն կազմում են տվյալ նիստի օրակարգում առկա հարցերի առյուծի բաժինը:  Ըստ այդմ դիտարկենք, թե ՀՀ վարչապետերից ո՞վ է աչքի ընկել առավել մեծ գաղտնապահությամբ և ում ղեկավարած կառավարության նիստերի օրակարգում են ընդգրկվել առավել մեծ թվով չզեկուցվող կամ գաղտնի հարցեր:

Դիցուք՝ Հովիկ Աբրահամյանի կառավարության նիստերի սղագրությունը ընթերցելիս հանդիպում ենք հետևյալ տվյալների:

2014 թվականի ապրիլի 17-ի նիստում, որը վարում էր վարչապետ Հովիկ Աբրահամյանը օրակարգում ընդգրկված էր 30 հարց, որից 10 չզեկուցվող էին, մեկը գաղտնի: 2015 թվականի նոյեմբերի 23-ի նիստում ընդգրկված է եղել 14 հարց, չզեկուցվող էին ընդամենը երեքը: 2015 թվականի մայիսի 11-ի նիստին ընդգրկված էր 27 հարց, որոնցից չզեկուցվող էին 9-ը:

Կարեն Կարապետյանի ղեկավարած կառավարության  2017 թվականի սեպտեմբերի 7-ի նիստում օրակարգում ներկայացված էր 30 հարց, որից 8-ը չզեկուցվող, երկուսը գաղտնի: Ահա ևս մեկ օրինակ ՝ 2018 թվականի  մարտի 5-ի նիստի օրակարգում էր 40 հարց, որից 27-ը չզեկուցվող, 4-ը՝ գաղտնի: 

2019 թվականի հոկտեմբերի 3-ի՝ Նիկոլ Փաշինյանի վարած նիստի օրակարգում ընդգրկված է եղել 47 հարց, որից 37-ը չզեկուցվող, մեկը՝ գաղտնի: 2020 թվականի հուլիսի 23-ի նիստի օրակարգում ընդգրկված էր 24 հարց, որից 17-ը չի զեկուցվում, եւս մեկ հարց գաղտնի էր: 2021 թվականի դեկտեմբերի 1-ի նիստին ընդգրկված բոլոր 26 հարցերը չզեկուցվող էին: Այսօրվա նիստի օրակարգում  ընդգրկված է եղել 30 հարց, որից 26-ը չի զեկուցվում, եւս 1 հարց գաղտնի է:

Ինչպես տեսնում ենք՝ թեև նախկինում նույնպես ՀՀ վարչապետերը և նրանց կաբինետները աչքի են ընկել որոշակի գաղտնապահությամբ, սակայն, դա որպես կանոն չի կրել նման արտադրական մասշտաբների, իսկ գաղտնի հարցերն էլ հիմնականում վերաբերվել են երկրի անվտանգային համակարգին: Իսկ Նիկոլ Փաշինյանի ղեկավարած կառավարությունը որոշել է այս հարցում էլ առանձնանալ և աչքի ըկնել հերթական աննախադեպ ցուցանիշով: