Մելիքսեթ Պողոսյանը իրեն «քցված» է զգում. նախկին մարզպետի մեսիջները` ՔՊ-ին

Շաբաթներ առաջ Նիկոլ Փաշինյանի որոշմամբ Սյունիքի մարզպետ Մելիքսեթ Պողոսյանն ազատվեց զբաղեցրած պաշտոնից: Մամուլը գրել էր, ինքը` Պողոսյանը, չէր էլ հերքել, որ իրեն առաջարկել էին մարզպետի պաշտոնի փոխարեն զբաղեցնել ՊՆ նախարարի խորհրդականի պաշտոնը, սակայն ինքը դեռ որոշում չի կայացրել:

Վերջին օրերին հնչող տարբեր հարցազրույցներից ակնհայտ է դառնում, որ Պողոսյանը, մեղմ ասած, նեղսրտած է ՔՊ-ի վերաբերմունքից և այն փաստից, որ իր արածը քաղաքական թիմը այդպես էլ չգնահատեց: Նա ամեն առիթով հղում է անում իր փորձին և ունեցած արժանիքներին` կարծես համադրելով դրանք կալավանցի Ռոբերտ Ղուկասյանի արժանիքների հետ և ակնարկելով, որ կադրային սխալ որոշում է կայացվել, Սյունիքն էլ բարդ մարզ է, այն պետք է ղեկավարի զինվորականը և ոչ թե ֆերմերը:

Բացի հրապարակավ նեսրտվածությունը արտահայտելուց` Պողոսյանը մարզում էլ ձեռքերը ծալած չի նստում: Նա դեռ ունի ազդեցության փոքր, սակայն լծակներ` ի դեմս յուրային համարվող փոխմարզպետ Կարո Ավանեսյանի, ով չնայած Ռոբերտ Ղուկասյանի ծավալած կադրային ռեֆորմների` դեռ պահպանել է իր պաշտոնը և, իհարկե, զարմիկի՝ Տեղ համայնքի ղեկավար Ղուլունցի: Հենց նրանց միջոցով էլ Պողոսյանը փորձելու է պահպանել ազդեցությունը մարզում և իր հարցազրույցներում էլ պարբերաբեր ակնարկում է, որ Սյունիքից չի հեռանա, այստեղ դեռ շատ գործեր ունի, որոնք, եթե շարունակենք Պողոսյանի միտքը՝ կիսատ մնացին Փաշինյանի պատճառով: 

Ի դեպ, Պողոսյանը նեղսրտելու բազմաթիվ պատճառներ ունի: Նա էր, որ հերքում էր ադրբեջանցիների ակնհայտ առաջխաղացման հանգամանքները, նա էր, որ հայտարարում էր, որ Սյունիքից զորքերի հետքաշման հրաման տալ Փաշինյանից պահանջել են ռուս խաղաղապահները, նա էր, որ ՏԻՄ ընտրություններին ամեն գնով և ձեռքի տակ եղած հնարավոր լծակներով ջանում էր ՔՊ-ականների ընտրվելուն հասնել: Այդքանից հետո Պողոսյանը ունի իրեն ՔՊ-ի և Փաշինյանի կողմից քցված զգալու բոլոր հիմքերը...