Սարգսյան vs Մարության. ո՞վ է ավելի շատ մսխել Երևանի «սուղ» բյուջեն

Երևանի քաղաքապետարանը բնակիչներին ավետել է, որ մոտ ապագայում նրանց սպասվում է նոր և անչափ կարևոր, արդիական և օրակարգային փոփոխություն: Այն է՝ Երևանի տրոլեյբուսային պարկը կհամալրվի 10 նոր տրոլեյբուսներով: Եվ այստեղ խնդիրը անգամ այն հարցը չէ, թե արդյո՞ք Երևանին տրոլեյբուսներ անհրաժեշտ են, թե ոչ, խնդիրը վերջիններիս գինն է, այն է՝ 10 ավտոբուսի դիմաց քաղաքապետարանը բյուջեից պատրաստվում է վճարել 2 միլիարդ դրամ: Որպեսզի քաղաքացիների էլ ավելի լայն շրջանակ ծանոթանա, թե ինչպիսի օգտակար գնում են պատրաստվում իրականացնել մայրաքաղաքի ղեկավարները՝ այդ լուրը փոխքաղաքապետերից մեկը նույնիսկ ֆեյսբուքյան գովազդի տակ էր տարածում:

Իսկ այժմ վերադառնանք բուն թեմային: Եվ այսպես ՝ 10 ավտոբուս 2 միլիարդ դրամով: Հարց է առաջանում՝ իսկ ի՞նչ եղան յուղը վրան ավտոբուսները, որոնց ներմուծման մասին երևանցիներն արդեն մի քանի տարի է` լսում են: Կարծես թե, բարեհաջող կերպով գնեցին և ներմուծեցին, սակայն, անգամ ինքը` քաղաքապետ Հրաչյա Սարգսյանը, չի հասկանում՝ ո՞ւր են դրանք, անզեն աչքով էլ երևում է, որ նոր ավտոբուսների մեծ մասը գիծ մինչ օրս դուրս չի եկել, երևանցիների տրանսպորտային խնդիրներն էլ չեն լուծվել: Այսինքն` այդ անիմաստ ծախսերին քաղաքապետարանը պատրաստվում է գումարել նորը: Հետաքրքիր է՝ արդյո՞ք այդ տրոլեյբուսները ոսկուց են կամ գուցե Տեսլա են, այդ պատճառով է գինն այդքան աստղաբաշխական: Տվյալ գումարով Երևանում կարելի էր մի քանի կիսաքանդ բնակելի շենք հիմնանորոգել, ապաստարաններ կառուցել որոնց պակասը մայրաքաղաքում շատ է զգացվում: Բայց, արի ու տես, Հրաչյա Սարգսյանը դասեր չի քաղել Հայկ Մարությանի կատարած անիմաստ ծախսերից, որոնք, ի դեպ, հաճախ է քննադատում նիստերի ընթացքում և ցանկանում է իր կողմից նմանատիպ ծախսերն ավելացնել: Թե ինչ է շահելու դրանից երևանցին՝ դժվար է ասել...