Իշխանական վերնախավում Ռոմանոս Պետրոսյանից լուրջ դժգոհություն է հասունանում

Նախորդ տարվա դեկտեմբերի սկզբին, երբ Ռոմանոս Պետրոսյանը նշանակվեց ՊՎԾ պետ, վարչապետ Նիկոլ Փաշինյանը չէր թաքցնում, որ բավական մեծ հույսեր է կապում վերջինիս հետ: Փաշինյանը ակնարկել էր, որ այնքան էլ գոհ չէ ՊՎԾ այն ժամանակվա գործող ղեկավար Տիգրան Ուլիխանյանի աշխատանքից և արդյունքներից և ի տարբերություն նրա` Պետրոսյանից ակնկալում է կառույցի աշխատանքների ռեստարտ և նոր աղմկահարույց բացահայտումներ: Պետրոսյանը ՊՎԾ-ում պետք է դառնար Նիկոլ Փաշինյանի «աչքերը»:

Անցել է բավականին երկար ժամանակ, սակայն Փաշինյանի «աչքերը» ակնհայտորեն իրենց չեն արդարացնում: Մեր աղբյուրների փոխանցմամբ՝ Ռոմանոս Պետրոսյանի աշխատանքից իշխանական վերնախավում լուրջ դժգոհություն է հասունացել, ինքը` Փաշինյանն էլ նեղ շրջանակում չի թաքցրել իր դժգոհությունը ՊՎԾ պետի գործելաոճից և ցուցադրած արդյունքներից: Ըստ էության, Ռոմանոս Պետրոսյանի գլխին սկսել են մութ ամպեր կուտակվել և դա չնկատել` հնարավոր չէ:

Եթե դիտարկելու լինենք Պետրոսյանի ղեկավարման երեք ամիսները, ապա իշխանական վերնախավի դժգոհության պատճառները պարզ են դառնում: Երեք ամիսների ընթացքում Ռոմանոս Պետրոսյանի ղեկավարած ՊՎԾ-ն որևէ նոր բացահայտում չի արել, նախկինում մեկնարկած ստուգումներից մինչ օրս որևէ նորություն չկա: Սակայն, ակնհայտ է, որ դժգոհությունները Պետրոսյանից սկսեցին ի հայտ գալ դեռևս ամիսներ առաջ՝ ՏԻՄ ընտրություններում և հատկապես Աբովյանում ՔՊ ջախջախիչ պարտությունից հետո, ընտրություններում իշխանական թիմի թեկնածուի կուռացիան իրականացնում էր անձամբ Ռոմանոս Պետրոսյանը, ում մտերիմն էլ հենց ՔՊ քաղաքապետի թեկնածուն էր, սակայն ֆիասկոն ավելի քան խոսուն էր: Հենց դրանից հետո Փաշինյանը վերջինիս ազատեց նախարարի պաշտոնից` ըստ էության, իջեցնելով ՊՎԾ պետի պաշտոնի: Սակայն, աստեղ էլ Պետրոսյանը իրեն չի արդարացնում, քանի որ ՊՎԾ ռեպրեսիվ ապարատը չի աշխատում ոչ յուրայինների, ոչ էլ ընդդիմախոսների դեմ, բացահայտումներ ընդհանրապես չկան և դա Փաշինյանին չի կարող չմտահոգել: Պարապուրդի մատնված ՊՎԾ պետը միևնույն ժամանակ շարունակում է ավանդույթի համաձայն հայտնվել տարատեսակ սկանդալային պատմությունների կիզակետում, մասնավորապես նրա դատական քաշքուքները Կոտայքի մարզպետարանում իր նախկին ենթակաների հետ դեռևս շարունակվում են, իսկ մարզի մի շարք պետական հիմնարկների տնօրեններ բողոքում են, որ Պետրոսյանը չի հրաժարվում ԽԾԲ-ի սկզբունքից` ամեն գնով ցանկանալով իր ծանոթներին աշխատանքով ապահովել:

Այս ամենը, անշուշտ, լուրջ ստվեր է գցում նաև Նիկոլ Փաշինյանի և քաղաքական թիմի վրա, թե ինչպիսի որոշում կընդունի Փաշինյանը և կտեսնենք` արդյոք մոտ ապագայում ևս մեկ աղմկահարույց պաշտոնազրկում՝ ցույց կտա ժամանակը...