Փաշինյանի «տրոյական ձին». ո՞ւմ դեմքով է ՔՊ-ն պատրաստվում զավթել Վանաձորը

Վանաձորում ՏԻՄ ընտրություններից հետո լարվածությունը չի նվազում, ՔՊ-ին, չնայած բոլոր ճնշումներին, այդպես էլ չի հաջողվում իրենով անել քաղաքապետի աթոռը:

Մամուլը գրել էր, որ Փաշինյանը Վանաձորի համար նոր սխեմա  է մտածել, այն է՝ Վանաձորի քաղաքապետի ԺՊ կնշանակվի Արկադի Փելեշյանը, հայտնի Ակկան, ով ԱԺ նախկին խոսնակ Էդուարդ Շարմազանովի եղբոր սանիկն է և բացի այդ էլ, հայտնի է որպես կիսաքրեական հեղինակություն: Ինքը՝ Փելեշյանը, չի հերքել այդ տեղեկությունը՝ հայտարարելով, որ հանուն Վանաձորի պատրաստ է համագործակցել բոլոր առողջ քաղաքական ուժերի հետ: Ըստ էության՝ առողջ քաղաքական ուժերի տակ Փելեշյանը հասկանում է հենց ՔՊ-ին:

Վանաձորում քվեների թվով երրորդ քաղաքական ուժի նախընտրական ցուցակը գլխավորած Արկադի Փելեշյանը 2016 թվականի ընտրություններին Արթուր Բաղդասարյանի «Հայկական վերածնունդ» կուսակցության թեկնածուն էր։ Թեև այդ ժամանակ «Հայկական վերածնունդն» իրեն ընդդիմադիր էր հռչակել, բայց, առավելագույն ձայներ ստացած Հանրապետական կուսակցության հետ համագործակցության հուշագիր ստորագրեց, և Արկադի Փելեշյանը նշանակվեց համայնքի ղեկավարի առաջին տեղակալ։ Այս ընտրություններին արդեն Փելեշյանն ընտրապայքարի մեջ մտավ բոլորին անհայտ Հայաստանի աշխատավորական սոցիալիստական կուսակցության միջոցով։ Ընդ որում, ընտրական ցուցակի երկրորդ համարը Մամիկոն Ասլանյանի մյուս տեղակալն էր՝ Արման Բերնեցյանը։  Ինչպես երևում է՝ մեկ անգամ ընդդիմադիր դիրքերը դավաճանած և ՀՀԿ հետ համագործակցած Փելեշյանը այս անգամ էլ նման օգնություն է պատրաստվում ցուցաբերել ՔՊ-ին:

Միևնույն ժամանակ, այս սխեման իրագործելու համար ՔՊ-ին անհրաժեշտ էր նաև ԼՀԿ օգնությունը, որը և անչափ հոժարակամ ցուցաբերվեց: Շաբաթներ առաջ Վանաձորի ՏԻՄ ընտրություններին մասնակցած «Լուսավոր Հայաստան» կուսակցությունը դիմել էր դատարան՝ ավագանիում մանդատներ ունենալու իր իրավունքը պաշտպանելու նպատակով: Հասկանալի է, որ սա սովորական մանյովր էր, որի նպատակը ՔՊ-ի համար ժամանակ ձգելն էր: ԼՀԿ-ն նաև առանձին միջնորդությունն էր ներկայացրել Վարչական դատարան՝ պահանջելով պարտավորեցնել Վանաձոր համայնքի ավագանուն ձեռնպահ մնալ Վանաձոր միավորված համայնքի ղեկավար ընտրելուն ուղղված գործողություններից, այն է՝ համայնքի ղեկավար ընտրելու օրակարգով նիստ անցկացնելուց և ղեկավար ընտրելուց, ինչը բավարարվել էր։ Թեև դատարանն անփոփոխ է թողել Վանաձորի ՏԻՄ ընտրության արդյունքներն ամրագրող որոշումը, սակայն, ավագանին նիստ չի կարողանում անել, քանի որ չի վերացվել նիստ հրավիրելն արգելող դատարանի որոշումը։ Այս քաղաքական անձնազոհության համար ԼՀԿ-ն, ամեն դեպքում, պարգևատրվեց․ Էդմոն Մարուքյանը նշանակվեց հատուկ հանձնարարարություններով դեսպան:

Ինչպես տեսնում ենք՝ Փաշինյանը որոշել է Վանաձորը զավթել ոչ թե ՔՊ-ի դեմքով, այլ տրոյական ձին գործի դնելով և այս հարցում նրա հույսը հենց Արկադի Փելեշյանն ու Էդմոն Մարուքյանն են, վերջիններս էլ հոժարակամ օգնում են ՔՊ-ին, քանի որ պաշտոնը ավելի կարևոր է, քան ժողովրդի ընտրությունը...