Նիկոլ Փաշինյանի և ՔՊ-ի «ֆեյքապետության» դիմակը պատռվում է

 

Իհարկե, սա առաջին դեպքը չէ, երբ իշխանությունները փորձում են ֆեյքերի, ֆեյք օրակարգերի օգնությամբ ինչ-ինչ հարցեր լուծել։ 

 

Բոլորս էլ քաջ հիշում ենք հերոս Ռոբերտ Աբաջյանի պապիկի ելույթը հեղափոխական ամբիոնից 2018-ի ապրիլին, հեղափոխությունից հետո պարզվեց, որ Աբաջյանի պապիկը բնավ էլ այն անձը չէ, ով ներկայացվում էր, ֆեյք պապիկ էր։ Բեմում նրան խոսացնողը, ի դեպ, Էդուարդ Աղաջանյանն էր` վարչապետի աշխատակազմի ղեկավարը, իսկ այժմ` ԱԺ պատգամավոր։

 

Քաջ հիշում ենք նաև, թե ինչպես ԵԿՄ նախկին նախագահ, գեներալ Մանվել Գրիգորյանի հետ կապված «տուշոնկայի» պատմությունը դարձավ շոու, չներկայացվեց գեթ մեկ ապացույց, որ «բանակից գողացված տուշոնկան» որևէ կապ ուներ գեներալ Գրիգորյանի հետ։ Այն ժամանակ մամուլը գրել էր, որ հայտնի տեսանյութի հեղինակը ՔՊ-ական Հայկ Կոնջորյանն էր։

 

Այնուհետև գալով իշխանության` ֆեյքերի աշխատանքը համակարգվեց արդեն պետական միջոցներով հայտնի ՊՈԱԿ-ի օգնությամբ, որին բյուջեից տարեկան հարյուրավոր միլիոններ էին գնում։ Ֆեյքերի ՊՈԱԿ-ի ղեկավարներից էին Տարոն Չախալյանը, Հարություն Մովսիսյանը, ով այնուհետև նշանակվեց Հ1-ի տնօրեն, Լիլիթ Մինասյանը, ով այսօր ԱԺ պատգամավոր է։

 

Այնուհետև պարզվեց, որ ֆեյք են նաև մի շարք պաշտոնյաների դիպլոմները։ Մասնավորապես` նման սկանդալի կիզակետում հայտնվեց Սյունիքի արդեն նախկին մարզպետ Մելիքսեթ Պողոսյանը։

 

 

Վարչապետ Նիկոլ Փաշինյանն իր ֆեյսբուքյան էջում «Մարիամ Ավետիսյան» օգտատիրոջ գրառման «սքրինշոթ» է հրապարակել, որում, իբր, օգտատերը տեղեկացնում է, որ իրենց խմորեղենի արտադրամասն այս տարի լավ է աշխատել, և շնորհակալություն է հայտնում Նիկոլ Փաշինյանին: Ինչպես կռահեցիք` օգտատերը նույնպես ֆեյք էր։

 

Ի դեպ, վերջին շրջանում վարչապետի գրառումների տակ ակտիվություն ապահովողները, չգիտես ինչու, ոչ թե ՀՀ քաղաքացիներն են, այլ...հնդիկները։

 

Ֆեյքերի ձևավորման և տարածման գործում իր ուրույն դերն ու տեղը ունի նաև գործող իշխանությունների օրոք ստեղծված Perfect TV-ին էր և մյուս ֆեյք յութուբյան ալիքները, որոնք զբաղված են պրոիշխանական քարոզչությունով։ Ատելության արշավի մի մեծ բաժին ռեալիզացվում է Youtube սոցիալական ցանցում ստեղծված 1 տասնյակից ավելի ալիքներով, որոնք ամենօրյա կտրվածքով սուտ և կեղծիք են տարածում Հայաստանի Հանրապետության նախկին պաշտոնյաների, նրանց ընտանիքների անդամների, իշխանությունների համար անցանկալի այլ անձանց վերաբերյալ՝ վարկաբեկելով և զրպարտելով նրանց, ինչպես նաև հրահրելով ազգամիջյան թշնամանք։ Այսպես, 8rd.am, 8news.am, Nvideo Only1 և սրանց հետ փոխկապակցված մի քանի այլ յութուբյան ալիքների համակարգմամբ զբաղվում է Շավարշ Սարուխանյանը։ Շավարշ Սարուխանյանը հանդիսանում է «8րդ ալիք» ՍՊԸ-ի տնօրենը, ինչպես նաև Nvideo Only1-ի հիմնադիրն ու սեփականատերը, որը նույնական է NVO1 յութուբյան ալիքի հետ։ Շավարշ Սարուխանյանի ֆեյսբուքյան էջում հրապարակված բազմաթիվ լուսանկարներում առկա է նրա աշխատանքի ընթացքը գործընկերոջ՝ Հայկ Կարապետյանի հետ։ Հայկ Կարապետյանը, Շավարշ Սարուխանյանի հետ մեկտեղ, հանդիսանում է վերը նշված յութուբյան ալիքների համակարգողներից։

 

Իշխանական ամենահայտնի ֆեյք էջերից մեկը գործում է Ռեգինա Պրազյան անվան ներքո։ Այս էջը ամենաակտիվն է թիրախավորում ընդդիմադիրներին և ամենաինտիմ թեմաներից անգամ չի խորշում։ Ռեգինա Պրազյան ֆեյքն այնքան պետքական է իշխանություններին, որ նրա մի քանի գրառումներ հայտնվել են Փաշինյանին աջակցող շատ լրատվամիջոցներում։ Մամուլը գրել էր, որ Ռեգինա Պրազյան ֆեյք էջը վարում է ԱԺ իշխանական պատգամավոր Արփի Դավոյանը։ Նա է գրառումներ անում և պատասխանում մեկնաբանություններին: Դավոյանը, ի դեպ, այդ լուրը որևէ կերպ չի մեկնաբանել և չի էլ հերքել։

 

«Պատանեկության ստեղծագործական կենտրոն»-ի տնօրեն, իրավապաշտպան Նարե Արամյանը ֆեյք աշխատակիցներ էր գրանցել, ովքեր բնականաբար աշխատանքի չեն գնացել, սակայն աշխատավարձ վերջիններիս անունով դուրս է գրվել։

 

Ինչպես տեսնում ենք՝ հեղափոխությունից հետո երկրի թիվ մեկ պաշտոնյայի և նրա թիմակիցների, աջակիցների կողմից տարածվող ֆեյքերի մասշտաբները գալիս են ապացուցելու, որ գործ ունենք իրական ֆեյքապետության հետ, որի դիմակը, սակայն, քիչ-քիչ պատռվում է....