Հուշանվերներ, կոնյակներ, ադամանդներ. հեղափոխական թիմի ճոխ ծախսերը՝ հարկատուների հաշվին

Մինչև Հայաստանում տեղի ունեցած Թավշյա հեղափոխությունն` ընդդիմադիրների խոշորացույցի տակ էին գտնվում իշխանության այս կամ այն ներկայացուցչի՝ նախարարի, մարզպետի, քաղաքապետի կողմից պետական բյուջեի հաշվին արված ճոխ գնումները: Խոսքը հատկապես այս կամ այն առիթով գնված հուշանվերների մասին է, որոնց արժեքը հաճախ շուկայականից տասնապատիկ անգամ ավել էր նստում գերատեսչության վրա: Օրինակ՝ Նիկոլ Փաշինյանը և իր թիմը անչափ ցավագին էին տանում Երևանի քաղաքապետ Տարոն Մարգարյանի կողմից 4 միլիոն դրամով 4 շիշ կոնյակ որպես նվեր գնելը, Ծովագյուղի ՀՀԿ-ական համայնքապետի կողմից կես միլիոնի կոնյակ, 1 միլիոնի հուշանվերներ, 40 կգ շոկոլադ գնելու փաստը ընդդիմադիրները անգամ ԱԺ-ում քննարկման առարկա դարձրին: Ընդդիմադիրները մատի փաթաթան էին դարձրել նաև 2015-ին Հովիկ Աբրահամյանի այցը Ավստրիա: Այդ նպատակով գնվել էր 6 հատ 10 տարվա հնեցման «Դվին» կոլեկցիոն կոնյակներ, 24 հատ 20 տարվա հնեցման «Նաիրի» կոնյակներ, 10 տարվա հնեցման 12 հատ «Ախթամար» և 2 հատ 25 տարվա հնեցման «Էրեբունի» կոնյակներ: Այս ամբողջի համար «Ագուլիս Մեկ» ընկերությանը վճարվել է շուրջ 1.5 միլիոն դրամ:  Փաշինյանը ԱԺ-ում բողոքում էր նաև ՀՀԿ-ական Իգնատի Առաքելյանի գյուղնախարարության կողմից  միլիոն դրամով հուշանվեր-նարդի գնելու հանգամանքից:

Սակայն, հեղափոխությունից հետո իր իսկ թիմակիցները շատ ավելի ճոխ ճաշակներ են որդեգրել` խփելով նախկինների ռեկորդները: Դիցուք՝ հեղափոխությունից հետո ՀՀ ոստիկանության կարիքների համար 3,990,000 դրամի հուշանվեր է գնվել «Վիելվի Սենթըր»-ից: 6,710,000 դրամի ոսկերչական իրեր էլ գնվել են Երևանի ոսկերչական գործարանից, 5,3 միլիոն դրամի խմիչքներ են գնվել «Ագուլիս 1» ընկերությունից: Երևանի քաղաքապետարանը 292,000 դրամի հուշանվեր է գնել ԱՁ Կարինե Աճեմյանից: ՀՀ արդարադատության նախարարության քրեակատարողական ծառայությունը 1,471,200 դրամի ձեռքի ժամացույց է գնել «ԷՅ ԴԱԲԼՅՈՒ ԱՅ ԳՐՈՒՊ» ՓԲԸ ընկերությունից: 

ՀՀ ՊԵԿ կարիքների համար պատվիրակությունների ընդունման հետ կապված 1,877,700 դրամի հուշանվեր-կոնյակ է ձեռք բերվել Արբրեն ՍՊԸ ՍՊԸ-ից: Վարչապետի աշխատակազմի կարիքների համար 2,906,000 դրամի հուշանվեր է գնվել «Շուշան Տեխնիկս» ՍՊԸ-ից: ԱԺ-ն նույնպես հետ չի մնացել նվերային այս տենդից: «ԱԴՏՄ-ՀԱՐԱՎ» ՍՊԸ-ից 2019-ին ԱԺ-ն ձեռք է բերել Պաշտոնական պատվիրակության ընդունելության համար հուշանվեր խմիչքներ՝ 17.590.075 դրամով (3 պայմանագիր)։

Հաջորդիվ «Նոյան տապան» ՍՊԸ-ն է, որից ԱԺ-ն ձեռք է բերել հուշանվեր-գրքեր՝ 7.815.241 դրամով (4 պայմանագիր)։ Հաջորդը՝ «ԷՅ ԴԱԲԼՅՈՒ ԱՅ ԳՐՈՒՊ» ՓԲԸ-ն է, որից ԱԺ-ն ձեռք է բերել հուշանվեր-ժամացույցներ (4 պայմանագիր)։ Այս ընկերությունից, օրինակ, ԱԺ-ն ձեռք է բերել 3 ժամացույց՝ յուրաքանչյուրը 175.000 դրամ արժողությամբ, ևս 3-ը՝ յուրաքանչյուրը 140.000 դրամ արժողությամբ, յուրաքանչյուրը 92.000 դրամ արժողությամբ 5 ժամացույց, ևս 2 ժամացույց՝ յուրաքանչյուրը 82.000 դրամ արժողությամբ և նույն արտադրության բազմաթիվ այլ ժամացույցներ։ Ընդհանուր, փաստորեն, ավելի քան 16.000 դոլարի՝ նույն բրենդի ժամացույցներ։ 

2020 թվականի  Էջմիածնի քաղաքապետարանը 19 մլն 115 հազար դրամ էր հատկացրել համաքաղաքային միջոցառումների անցկացման, կես միլիոն դրամ՝ ծաղկեպսակների եւ ծաղիկների ձեռքբերման նպատակով։ Բացի այդ, ձեռք էր բերվել 5 հատ ոսկե մատանի՝ ադամանդե քարերով։ Ի արդարացումն վերջինիս` նշենք, որ մատանիները նորապսակների համար էին նախատեսված:

Վարչապետ Նիկոլ Փաշինյանի աշխատակազմը ընդհանուր 671 հազար դրամի կոնյակ է գնել, որից 13 հատը՝ «Ազնավուր» անվամբ, և 3 հատը՝ «Նաիրի» անվամբ։ Մատակարարը «Վինո Վինո» ՍՊԸ-ն է, որը վարչապետի աշխատակազմի համար 50 տոկոս զեղչ է արել։ «Ազնավուր» կոնյակի 1 շիշն արժե 83 հազար դրամ, իսկ «Նաիրի» կոնյակինը՝ 39 հազար դրամ։ Բացի այս, վարչապետի աշխատակազմը «Արմչիր» ՍՊԸ-ից գնել է 3 տուփ չիր, մեկ տուփը՝ 15 հազար դրամով, սակայն այդ ընկերությունից վարչապետի համար զեղչ չեն արել։