Օբաման պարտվել է Ռոմնիի հետ առաջին հեռուստաբանավեճում

Կոլորադո նահանգի Դենվեր քաղաքում կայացել է նախընտրական հեռուստաբանավեճերի առաջին փուլը Բարաք Օբամայի և Միթ Ռոմնիի միջև։ 90 րոպեների ընթացքում ԱՄՆ-ի նախագահի թեկնածուները բանավիճում էին ներքաղաքական և տնտեսական հարցերի շուրջ. հայտնում է BBC-ի ռուսական ծառայությունը։

Բանավեճի ընթացքին կարելի էր հետևել YouTube կայքի, ինչպես նաև Twitter միկրոբլոգային կայքի միջոցով։

Հանրապետական Միթ Ռոմնին քննադատության է ենթարկել Օբամայի կառավարության տնտեսական քաղաքականությունը, մասնավորապես, Ուոլ Սթրիթի նախաձեռնած բարեփոխումը և պետության բյուջեի դեֆիցիտի բարձր մակարդակը, որի կրճատումը Օբաման խոստացել էր ապահովել դեռևս 2008 թվականին։

Ռոմնիի խոսքերով՝ լինելով նախագահ՝ նա կհրաժարվի ցանկացած կառավարական ծրագրի իրականացումից, որի համար անհրաժեշտ կլինի «Չինաստանից պարտքով փող վերցնել»։

Ի պատասխան՝ դեմոկրատների թեկնածու Օբաման հերթական անգամ մեղադրեց մրցակցին «անիրականանալի խոստումներ» տալու համար՝ մտադրվելով միանգամից վերացնել բյուջեի դեֆիցիտը և կրճատել հարկերը։ ԱՄՆ-ի գործող նախագահն ասել է, որ Ռոմնին ծրագրում է պետական միջոցները ծախսել «արտասահմանում անտեղի ռազմական գործողությունների վրա», իսկ դրանց ֆինանսավորումը պետք է ապահովեն հարկատուները։

Ռոմնին իր հերթին մատնաշել է, որ Օբաման «սխալ է մեկնաբանում իր հարկային քաղաքականությունը»։

Հյուսիսային Ամերիկայում BBC–ի խմբագիր Մարկ Մարդելը հայտնում է, որ Բարաք Օբաման բանավեճը նյարդային սկսեց, բայց հետո բացվեց և «բանավիճելու և մրցակցի նկատողություններին ակտիվորեն պատասխանելու փոխարեն սկսեց մինի դասախոսություններ կարդալ»։
Ընդհանուր առմամբ, նախատեսված է անցկացնել նախընտրական բանավեճերի երեք փուլ։

Ռոմնիի և Օբամայի հաջորդ հանդիպումը տեղի կունենա հոկտեմբերի 16-ին. բանավեճը կանցկացվի Նյու Յորքում։