Նախկին նախարարներից ո՞վ առաջինը կգաղտնազերծի Փաշինյանի՝ «պետության շահերին հակասող» քայլերը

Օրերս բոցաշունչ գրառմամբ է հանդես եկել ՀՀ ԱԳՆ նախկին նախարար Զոհրաբ Մնացականյանը, ով իր Twitter-ում գրել է. «Պետք էր կույր լինել՝ չտեսնելու համար այն ռիսկը, որ Ադրբեջանը կօգտվի Ուկրաինայում ստեղծված իրավիճակից և Արցախում նոր սպանություններ ու տառապանքներ կիրականացնի. Ավելի քան 2 շաբաթ է, ինչ ցրտաշունչ եղանակին Արցախը մնացել է առանց գազի։ Պայմանները սահմանակից են հումանիտար աղետին։ Ադրբեջանը միտումնավոր ձգձգում է դեպի Արցախ միակ գազատարի վերանորոգումը, որն իր վերահսկողության տակ է գտնվում։ Աշխարհը հմայիչ կույր է։ Այստեղ ոչ մի նոր բան չկա»։

Այս գրառումը բավական լայն ռեզոնանս է առաջացրել և տրամաբանական հարցադրումներ են հնչել, թե ու՞ր էր Զոհրաբյանի սուր տեսողությունը, երբ վերջինս, լինելով արտգործնախարար, հանրությունից բավական մեծ թվով փաստեր է թաքցրել, սկսած նրանից, թե ինչպես լղոզվեց Վիեննայի և Սանկտ-Պետերբուրգի օրակարգերը, ինչպես 2019-ին Արցախյան բանակցությունների օրակարգը ամբողջովին փոխվեց, և ինչպես եղավ, որ 44 օր հաղթելուց  և իր դիվանագիտական ջանքերից հետո կնքվեց կապիտուլյացիոն պայմանագիրը, որն էլ այսօր Արցախում ստեղծված իրավիճակի թիվ մեկ պատճառն է հանդիսանում:

Պատերազմի ավարտից հետո հրաժարական տված Զոհրաբյանը ակնարկել էր, որ իշխանությունների ոչ բոլոր քայլերն են իր սրտով եղել: Նույնը ակնարկել է նաև նրան հաջորդած մյուս նախարարը՝ Արա Այվազյանը, ով բառացիորեն էր նշել, որ Նիկոլ Փաշինյանը իրականացնում է քայլեր, որոնք չեն բխում ՀՀ պետական շահերից և հենց դա է դարձել իր հրաժարականի պատճառը: Սա ոչ այլ ինչ է, քան հաղորդում հանցագործության մասին, որից հետո այդ հաղորդումը ներկայացրած պաշտոնյան պարզապես ընդհատակ է անցել: Մյուսն էլ կուրության մեջ մեղադրում է բոլորին, բացի ՀՀ իշխանություններից և ինչու ոչ՝ նաև իրենից:

Հարց է առաջանում` իսկ ե՞րբ հանրության հետ անկեղծ կխոսեն ԱԳՆ նախկին նախարարները և նրանցից ո՞վ առաջինը կբացի փակագծերը և կներկայացնի, թե Նիկոլ Փաշինյանի այդ որ քայլերն էին իրենց կողմից համարվել պետական շահերին հակասող: Հակառակ դեպքում` եթե պաշտոնաթող նախարարները շարունակեն լռել, ապա իրենք ևս կիսում են Հայաստանի և Արցախի շուրջ ստեղծված իրավիճակի ողջ պատասխանատվությունը....