Ո՞ւմ հաջորդը «ժերտվա կտա» Նիկոլ Փաշինյանը

Վերլուծական 31 Մարտ, 2022 21:33

ՊՎԾ պետ Ռոմանոս Պետրոսյանը երեկ հայտնել է, որ 2022 թվականի առաջին եռամսյակում իր ղեկավարած կառույցի կողմից իրականացվել է 106 մշտադիտարկում, որից 81-ը ավարտված են, իսկ 25-ը գտնվում են ընթացքում: Մշտադիտարկումների իրականացումն այս պահին շարունակվում է Արտաքին գործերի, Պաշտպանության, Էկոնոմիկայի նախարարություններում, Պետական եկամուտների կոմիտեում և այլ մարմիններում: 2022 թվականի առաջին եռամսյակում իրականացվել է 12 ուսումնասիրություն, որից 9-ը գտնվում են ընթացքում: Տվյալ պահին իրականացվում են ուսումնասիրություններ Առողջապահության, Պաշտպանության նախարարություններում, Երևանի քաղաքապետարանում, «Հայփոստ» ՓԲԸ-ում և այլ մարմիններում, այդ թվում՝ գործարքի կողմ հանդիսացող անձանց մոտ։

Ինչպես հասկանում ենք` այս պահին ՊՎԾ թիրախում են էկոնոմիկայի նախարար Վահան Քերոբյանը, առողջապահության նախարար Անահիտ Ավանեսյանը և Երևանի նախկին քաղաքապետ Հայկ Մարությանը։ Փաշինյանի կողմից նրանցից յուրաքանչյուրին «ժերտվա» տալու հավանականությունը անչափ մեծ է, քանի որ յուրաքանչյուրի վրա էլ կարելի է բարդել այս կամ այն տապալման մեղքը, արդյունքում ինքը` Փաշինյանը, ջրից չոր դուրս կգա։

Վահան Քերոբյանին Փաշինյանը կարող է մեղադրել խոստացած երկնիշ տնտեսական աճը չապահովելու, ներդրումների խոստացված ծավալը չներգրավելու մեջ։ Չնայած, պարզից էլ պարզ է, որ այդ ծրագրերը մշակվում են կառավարության կողմից և հաստատվում են կառավարության կողմից, հետևաբար խոստումների անկատար մնալու մեջ հավասարաչափ մեղավոր է նաև կառավարության ղեկավարը, ով, ի դեպ, չորորդ տարին է` փորձում է տնտեսական հեղափոխություն իրականացնել երկրում` դեռ ապարդյուն։

Հաջորդ պոտենցիալ թիրախը առողջապահության նախարար Անահիտ Ավանեսյանն է։ Կորոնավիրուսի համավարակի դեմ պայքաի գործընթացում նախարարության կողմից իրականացված ծախսերի և դրանց նպատակային իրականացման հետ կապված բազմիցս են հարցադրումներ եղել։ Ավանեսյանի վրա կարելի է բարդել համավարակի տապալման, պատվաստումների ոչ բավարար քանակի մեղքը, և, իհարկե, իրականացված ծախսերը, որոնք, ըստ էության, չեն տվել ցանկալի արդյունք։ Այս տեսանկյունից ավելի հեշտ կլինի հավանական կոռուպցիոն սխեմաների մեղքը բարդել մեկ նախարարի վրա, ինչի արդյունքում վարչապետը, ով նույնպես ի պաշտոնե պարտավոր էր հետևել ծախսերի արդյունավետությանը, մաքուր դուրս կգա։

Հաջորդ հավանական թիրախը Երևանի արդեն նախկին քաղաքապետ Հայկ Մարությանն է։ Հասկանալի է, որ այս ուսումնասիրությունը առավելապես լծակ է Մարությանի դեմ, որի ակտիվացման և քաղաքապետի պաշտոնում ինքնուրույն հավանական առաջադրման մասին մամուլը վերջին շրջանում հաճախ էր անդրադառնում։ Հասկանալի է, որ այդ լծակները գործի կդրվեն այն ժամանակ, երբ Մարությանը որոշի բացել այն տեղեկությունների շուրջ փակագծերը, որոնք հնչեցրել էր իր՝ քաղաքապետի պատոնում վարած վերջին նիստի ժամանակ, կամ լուրջ քաղաքական հայտ կներկայացնի:

Ինչպես տեսնում ենք՝ զոհաբերվելուց ՔՊ-ում որևէ մեկը ապահովագրված չէ, քանի որ այդպիսին է Նիկոլ Փաշինյանի ձեռագիրը և աշխատելաոճը: Մնում է հասկանալ՝ ով կլինի վարչապետի հաջորդ թիրախն ու զոհը...