Ռոմանոս Պետրոսյանի հերթական «ընծան»՝ մտերիմ նորաթուխ օլիգարխին

Օրեր առաջ հայտնի դարձավ, որ Սեւանի ափի երեք հանրային լողափների սպասարկման համար մրցույթ է հայտարարվել, եւ այդ մրցույթներում դեռ անցած տարի հաղթող է ճանաչվել «Պրոյեկտ ինտեր-ինվեստ» ՍՊԸ-ն՝ Ծաղկաձորի «Գոլդեն փելեսի» սեփականատերը։ Սակայն, իրականությունը այն է, որ դեռ տարվա սկզբում այդ պայմանագիրը կնքվել է «Մ.Յան» ՍՊԸ-ի հետ, որի հետ սակայն պայմանագիրը երկու ամիս անց խզվել է:  Պայմանագիրը չեղարկելուց հետո  հանրային լողափների սպասարկումն անմիջապես հանձնվում է «Պրոյեկտ ինտեր-ինվեստ» ՍՊԸ-ին: Այդ ժամանակ լրագրողներին հավաստիացնում էին, որ մրցույթ է հայտարարվել, եւ մրցույթը շահել է «Պրոյեկտ ինտեր-ինվեստ» ՍՊԸ-ն: Սակայն հիմա պարզվում է, որ ոչ մի մրցույթ էլ չի հայտարարվել, եւ նշված ընկերությունն առանց մրցույթի ստանձնել է լողափների սպասարկումը։ 

Հասկանալի է, որ սա իշխանությունների հերթական նվերն է իրենց սրտի նորաթուխ օլիգարխ Նարեկ Նալբանդյանին և չի բացառվում, որ այդ նվերը մատուցելու գործում իր ուրույն ավանդը ունի ՊՎԾ պետ Ռոմանոս Պետրոսյանը, ով, ըստ մամուլի, հանդիսանում է Նարեկ Նալբանդյանի ընկերն ու մտերիմը: Սա արդեն երրորդ դեպքն է, երբ Նալբանդյանի այս կամ այն գործարքը օրենքի տեսանկյունից հարցեր է առաջացնում: Սկզբում եղավ «Գոլդեն Փելըսի» գնումը, այնուհետև ձվի շուկայում դեմպինգը և «Լուսակերտի» սնանկացումը: Մամուլը գրել էր, որ ձվի շուկայում դեմպինգի հետևում կանգնած է հենց Նալբանդյանի պատկանող Շիրակ թռչնաֆաբրիկան: Այնուհետև եղավ Հովիկ Աբրահամյանի առանձատան ձեռքբերումը. գործարք, որից տեղյակ չէր անգամ դատախազությունը: Այժմ էլ առանց մրցույթի Նալբանդյանի ՍՊԸ-ին է հանձնվում Սևանի հանրային լողափերի սպասարկումը: Իսկ այս ընթացքում լռում է թե՛ ՄՊՀ-ն, թե՛ Կոռուպցիայի կանխարգելման հանձնաժողովը:

Ինչպես տեսնում ենք՝ իշխանություններին և հատկապես Նալբանդյանին մոտ կանգնած ՔՊ-ական պաշտոնյաներին չի հուզում, որ այս դրվագներում առկա է օրենքի խախտման բացահայտ դրվագներ, նրանք չափից դուրս զբաղված են նոր օլիրգախներ աճեցնելով...