Սերժ Սարգսյանից «դասեր» քաղածը

Վերլուծական 2 Ապրիլ, 2022 21:48

Թեև Նիկոլ Փաշինյանը հաճախ և տարբեր առիթներով հայտարարում է, որ ՔՊ-ի ներսում տիրում է լիակատար իդիլիա և վստահության մթնոլորտ` իր քայլերը և հատկապես նշանակումները խոսում են ՔՊ-ի ներսում առկա հակառակ իրողության մասին։ Բանն այն է, որ Նիկոլ Փաշինյանը մեկ հարցում ևս դասեր է քաղել նախկին նախագահ Սերժ Սարգսյանից և ինչպես ժամանակին Սարգսյանը, այնպես էլ այժմ Փաշինյանը, ակտիվորեն կիրառում է զսպումների, հակակշիռների մեխանիզմ իր թիմի ներսում` տարատեսակ նշանակումներով փորձելով բալանսավորել և որն ամենակարևորն է` վերահսկել իր թիմակիցներին։

Դիցուք` ամիսներ առաջ, երբ Սփյուռքի գործերի գլխավոր հանձնակատար Զարեհ Սինանյանը հարցազրույցներից մեկում քննադատեց կառավարության ներգաղթային քաղաքականությունը, դրան անմիջապես հաջորդեց Փաշինյանի նշանակումը։ Երեմ Սիմոնյանը նշանակվռց գրասենյակի ղեկավարի տեղակալ, Սիմոնյանը կառույցում աշխատել էր 2018 թվականին` համարվելով դեռ այն ժամանակվա Սփյուռքի նախարար Մխիթար Հայրապետյանի մարդը։ Մամուլը այդ ժամանակ գրեց, որ Սիմոնյանի նշանակումը մեկ նպատակ էր հետապնդում` վերահսկել Սինանյանին։

Ռոմանոս Պետրոսյանին ՊՎԾ պետ նշանակելուց հետո Փաշինյանը այդքանով կանգ չառավ։ Մասնավորապես՝ ՊՎԾ պետ Ռոմանոս Պետրոսյանի տեղակալ նշանակվեց ԱԱԾ պետի նախկին տեղակալ, 2020 թվականի հուլիսին այդ պաշտոնից հեռացած Ռոբերտ Բազիկյանը: Ստացվում է` Փաշինյանը չի վստահում Ռոմանոս Պետրոսյանին և «ստրախովկայի» համար վերջինիս տեղակալ է նշանակում ստաժավոր ԱԱԾ-ականի, ով, ըստ վարչապետի, ավելի լավ կկատարի իր առջև դրված խնդիրները:

Ինչ վերաբերվում է ՊԵԿ-ին, ապա այստեղ ակնհայտ է, որ Փաշինյանի համար ընդամենը մեկ անձեռնմխելի պաշտոնյա կա և դա մաքսային ոլորտը համակարգող ՊԵԿ նախագահի տեղակալ Շուշանիկ Ներսիսյանն է, ում պարտականությունների մեջ է մտնում նաև զսպել և հակակշռել ՊԵԿ նախագահներին, որոնք, ի դեպ, բավականին հաճախ են փոխվում։

Ամիսներ առաջ պետական պահպանության ծառայությանը տրվեց վարչապետին ենթակա մարմնի կարգավիճակ՝ այն դուրս բերելով ԱԱԾ մարմինների համակարգից: Մամուլը գրեց, որ սա վառ վկայությունն է այն բանի, որ Փաշինյանը չի վստահում ԱԱԾ պետ Արմեն Աբազյանին։

Ընդամենը մեկ օր առաջ էլ Նիկոլ Փաշինյանը նոր նշանակում կատարեց` առողջապահության և աշխատանքի տեսչական մարմնի ղեկավարի տեղակալի պաշտոնը տալով Սլավիկ Սարգսյանին: Մամուլը գրել էր, որ սև ամպեր են կուտակվել տեսչական մարմնի տնօրեն Հակոբ Ավագյանի գլխին: Գործադիրն Ավագյանին պաշտոնանակ անելու ներքին որոշում ունի, բայց դա անելու համար առայժմ որևէ ձև ու միջոց չի գտնում և նույն մամուլի տեղեկություններով՝ Սարգսյանի գործառույթն Ավագյանին վերահսկելը պետք է լինի:

Օրեր առաջ վարչապետի հրամանով Սյունիքի մարզպետ նշանակվեց Փաշինյանի խորհրդական կալավանցի Ռոբերտ Ղուկասյանը։ Մինչդեռ հիմնական մարզպետացուն նախկին փոխվարչապետ Տիգրան Ավինյանի մտերիմ, նրա կողմից լոբբինգ արվող կապանցի պատգամավոր Դավիթ Դանիելյանն էր։ Ըստ էության, Փաշինյանը չվստահեց Ավինյանի կադրին, ասել է թե` Ավինյանին և նախընտրեց մարզպետ կարգել իր խորհրդականին։

Փաշինյանի վստահությունը նվազել է նաև պատգամավոր Անդրանիկ Քոչարյանի հանդեպ։ Ամիսներ առաջ մամուլը գրել էր, որ Քոչարյանը ընդհուպ մինչև պալատական հեղաշրջման է պատրաստվում Փաշինյանի թիկունքում։ Տարածվող այդ լուրերի ֆոնին էլ հենց Փաշինյանը շտապեց ԳՇ պետի պաշտոնում Արտակ Դավթյանի նշանակումով Անդրանիկ Քոչարյանին հակակշռել, հատկապես, որ գիտենք Արտակ Դավթյանի բավականին կոշտ վերաբերմունքը Քոչարյանի հանդեպ։ Բացի այդ, Փաշինյանը ՊՆ նախարար Սուրեն Պապիկյանի շուրթերով օրերս դեղին քարտ ցույց տվեց Քոչարյանին։ Հիշեցնենք` Պապիկյանը քննադատել և հետ էր ուղարկել զինված ուժերի բարեփոխման ռազմավարությունը, որի մշակման վրա աշխատում էր հենց Քոչարյանը։

Ինչպես տեսնում ենք՝ Նիկոլ Փաշինյանի կողմից այդքան գովերգած վստահության մթնոլորտի պակասը ՔՊ-ում ավելի քան ակնհայտ է, իսկ ինքը` Փաշինյանը, թիմակիցներին հակակշռելու, բալանսավորելու և, իհարկե, վերահսկելու հարցում չի խորշում շարունակել Սերժ Սարգսյանի ձեռագիրը, որից, ինչպես երևում է, բավական լավատեղյակ է...