Ովքեր են օլիգարխների շահերը և սեփական «գործն» առաջ մղող ՔՊ-ական պաշտոնյաները

Վերլուծական 4 Ապրիլ, 2022 20:48

Ովքեր են օլիգարխների շահերը և սեփական «գործն» առաջ մղող ՔՊ-ական պաշտոնյաները

Չնայած այն հանգամանքին, որ վարչապետ Նիկոլ Փաշինյանը բազմիցս է հայտարարել՝ Նոր Հայաստանում չեն կարող լինել գործարար պաշտոնյաներ, առավել ևս խոշոր բիզնեսի շահը չի կարող վեր դասվել հպարտ քաղաքացիների շահերից` իրականությունն այսօր այլ է: Իհարկե, նույն ՀՀԿ-ն Փաշինյանի քննադատության տակ էր հայտնվում այն պատճառով, որ այս քաղաքական ուժի ներկայացուցիչները, որպես կանոն, ազգ ու տակով բիզնեսմեններ էին, իսկ այն ժամանակվա ընդդիմությունը պնդում էր, որ բիզնեսը և քաղաքականությունը պետք է առանձնացվեն իրարից: Գալով իշխանության, սակայն, Փաշինյանը մոռացավ այդ սկզբունքի իմպլեմենտացիայի մասին և այժմ հենց իր կադրերը կամ իր կողմից նշանակված պաշտոնյաներն են լծվել գործարարությանը և հպարտ քաղաքացիների հաշվին` խոշոր բիզնեսի շահերի լոբբինգի։

Օրինակ՝ Լոռու նախկին մարզպետ Անդրեյ Ղուկասյանը, դեռևս զբաղեցնելով այդ պաշտոնը, ինքն իր համար ատամնաբուժարան էր կառուցում: Շինությունը կառուցում են իբրև ատամնաբուժարան, որը գտնվում է քաղաքի ամենից թանկարժեք տեղում՝ Վանաձորի Տիգրան Մեծի պողոտայի վրա։ Շինթույլտվությունը Ղուկասյանը ստացել է 2018թ․ հոկտեմբերին։ Նույն ամսվա 10-ին նշանակվել է մարզպետ, մինչ այդ եղել է մարզպետի տեղակալը։

Կարեն Սարուխանյանն անասնաֆերմա ունի Արփի Լիճ ազգային պարկից ոչ հեռու, իսկ ազգային պարկը շատ հարմար արոտավայր ու խոտհարք է հանդիսանում ամբողջ տարածաշրջանի համար: Ի դեպ, նշենք, որ Սարուխանյանի ֆերմայի անասնագլխաքանակը 7-8 անգամ աճել է հեղափոխությունից ի վեր։

Ամիսներ առաջ մամուլը գրեց, որ առողջապահության նախարար Անահիտ Ավանեսյանի հետ առնչություն ունեցող դեղագործական ընկերությունը դեղորայք և բժշկական պարագաներ է վաճառում իր իսկ ենթակայության տակ գտնվող պետական կառույցներին։ «Արմֆարմացիա» ընկերությունը վերջին տարիներին կնքել է 240 պայմանագիր՝ 44 պետական կառույցի հետ, ընդհանուր՝ մոտ 606,7 մլն դրամ արժողությամբ, որի կեսից ավելին՝ 137 պայմանագիրը՝ արդեն Ավանեսյանի` փոխնախարար եղած ժամանակ։

Ոչ պակաս արդյունավետ էր հեղափոխական պաշտոնյաների համար ասֆալտի բիզնեսը: Մինչեւ նախորդ տարի՝ որպես շինաշխատանքների ենթակապալառու, ծրագրերի կապալառու հանդիսացող «Կոքս-Քոնսալթինգ» ընկերությունն անընդհատ ընտրում էր միեւնույն «Դոռզնակ» ՍՊԸ-ին։ «Դոռզնակ» ՍՊԸ-ն պատկանում է հայր եւ որդի Սամվել եւ Բագրատ Բադալյաններին։ Բագրատ Բադալյանը տարածքային կառավարման եւ ենթակառուցվածքների նախկին նախարար Սուրեն Պապիկյանի տեղակալն էր՝ ճանապարհների գծով:

Արարատի նախկին մարզպետ Գարիկ Սարգսյանը ըստ մամուլի հրապարակումների հաջողության իրենով է արել Արաքսի ափին ավազի արդյունահանման բիզնեսը; Տվյալ բիզնեսը այնպիսին է, որով հնարավոր է զբաղվել միայն վարչական լծակների առկայության դեպքում, ինչը այսօր չունեն Աբրահամյանները որոնց ժամանակին էլ այն պատկանում էր, բայց ունի Սարգսյանը:

ԱԺ առողջապահական հարցերի հանձնաժողովի նիստում քննարկվեց «Բնակչության բժշկական օգնության եւ սպասարկման մասին» օրենքում փոփոխություններ եւ լրացումներ կատարելու մասին նախագիծը, որի հեղինակներից մեկն է ՔՊ խմբակցության պատգամավոր Նարեկ Զեյնալյանը: Նախագծով առաջարկվում է դիահերձման իրավունք տալ միայն ԲԿ-ին կից դիահերձարաններին, իսկ թե ում են պատկանում խոշոր ԲԿ-ը` գաղտնի չէ, Սամվել Ալեքսանյան, Արկադի Համբարձումյան` շարքը կարելի է երկար շարունակել։

ՄՊՀ-ն, իր ղեկավար Գեղամ Գևորգյանի գլխավորությամբ շարունակում է հերքել մարդկանց աչքով տեսածը` պաշտպանելով օլիգարխների շահերը։ ՄՊՀ-ն աչք է փակում Հայաստանում առկա բացահայտ մենաշնորհային դրսևորումների վրա, իր զեկույցներում մշտապես արդարացնելով խոշոր բիզնեսի հակամրցակցային գործողությունները:

ՔՊ-ական պատգամավորներ Հովիկ Աղազարյանի և Գևորգ Պապոյանի ակտիվ ջանքերի շնորհիվ օրինագիծը, որը պետք է կանխեր հեղուկ գազի վաճառքի կետերում սպառողներին խաբելու և մոլորեցնելու բոլոր փորձերը` հետ ուղարկվեց լրամշակման։ Որևէ մեկի համար գաղտնիք չէ, թե ովքեր են բենզինի շուկայում եղանակ ստեղծողները: Դրանք նախկին իշխանությունների հետ անմիջական կապեր ունեցող հայտնի օլիգարխներն են, որոնց ապօրինություններին վերջ տալու նպատակով էլ առաջարկվում էր կատարել այս փոփոխությունը, որն էլ ՔՊ-ական պատգամավորների թեթև ձեռքով կասեցվեց:

Ռոմանոս Պետրոսյանի ջանքերով այսօր կերտվում է ևս մեկ օլիգարխ։ «Գոլդեն Փելես»-ը գնաց Նարեկ Նալբանդյանին, ով հանդիսանում է Պետրոսյանի ընկերը, թույլ տվեցին դեմպինգ իրականացնել ձվի շուկայում, օրենք խախտելով գնել Հովիկ Աբրահամյանի դղյակը, բացի այդ, առանց մրցույթի Նալբանդյանի ընկերությանը հանձնեցին Սևանի հանրային մի շարք լողափերի սպասարկումը։

Ինչպես տեսնում ենք՝ հպարտ քաղաքացիների շահերը պաշտպանելու խոստումներով իշխանության եկած հեղափոխականները շատ արագ փոխակերպեցին այդ շահերը սեփական և խոշոր օլիգարխների բիզնես շահերով, որոնց պաշտպանության համար էլ չեն խորշում օգտագործել պետական ապարատի բոլոր հնարավորությունները...