Իշխանություններն աչք են փակո՞ւմ բացահայտ կլանային քաղաքականության վրա

Կոռուպցիոն երևույթների դեմ հուժկու պայքար մղող Նիկոլ Փաշինյանը, թերևս, այնքան էլ անկեղծ չէ իր մղումներում կամ պարզապես տեղյակ չէ, որ մի շարք պաշտոնյաներ տնով-տեղով փորձում են մոնոպոլիզացնել մի ամբողջ ոլորտ:

Դիցուք՝ այն բանից հետո, երբ ֆինանսների նախկին նախարար Ատոմ Ջանջուղազյանը ՔՊ-ի ջանքերով ընտրվեց հաշվեքննիչ պալատի նախագահ, շատերի մոտ հարցեր էին առաջացել` արդյո՞ք չկա շահերի բախում այն հանգամանքում, որ, ստանձնելով այդ պաշտոնը, նա, ըստ էության, ինչ-որ  տեղ պետք է աուդիտ անցկացնի այն բյուջեի կամ այն համակարգի նկատմամբ, որը վերջին երեք տարիներին անձամբ ղեկավարել է:

Սա էլ դեռ բավարար չէր, մամուլում մի շարք ուշագրավ գրառումներ հայտնվեցին Ատոմ Ջանջուղազյանի եղբոր ղեկավարած ՓԲԸ-ի վերաբերյալ: Դիցուք՝  գրել էին որ «Ինտեր Լիմենս» ՓԲԸ-ն, որի տնօրենն է հանդիսանում Գագիկ Ջանջուղազյանը, տարիներ շարունակ փաստացի մենաշնորհային կարգավիճակով զբաղվել է կոռուպցիոն մեծ ռիսկեր պարունակող ոլորտի՝ պետական գնումների կազմակերպմամբ, գնումների գործընթացի վերաբերյալ խորհրդատվության տրամադրմամբ, ինչը մեծ շահույթներ է ապահովել: 

Այնուհետև Հրապարակը գրեց այն մասին, որ Ատոմ Ջանջուղազյանը 2018թ. դեկտեմբերի վերջերին ժամանակավորապես կասեցրել էր «Ինտեր Լիմենս» ՍՊԸ-ի գործունեությունը: Սակայն այժմ էլ  մշակվել է մի նոր եղանակ՝ պետական գնումների ամբողջ ոլորտը մենաշնորհելու ուղղությամբ:

«Ո՞ւմ ձեռքին են կենտրոնացած պետական գնումները» հոդվածում 168.am-ը գրել էր, որ ըստ մամուլի հրապարակումների և համացանցում տեղ գտած տվյալների՝ «Ինտեր լիմենս» ՓԲԸ հաճախորդներից են եղել՝ Երևանի քաղաքապետարանը, ՀՀ կառավարությանն առընթեր Ազգային անվտանգության ծառայությունը, «Սարդարապատի հերոսամարտի հուշահամալիր, Հայոց ազգագրության և ազատագրական պայքարի պատմության ազգային թանգարան» ՊՈԱԿ-ը, «ՀՀ փորձագիտական կենտրոն» ՊՈԱԿ-ը, «Երևանի էլեկտրատրանսպորտ» ՓԲԸ-ն, «Հայաստանի պետական տնտեսագիտական համալսարան» ՊՈԱԿ-ը, «ՀՀ արդարադատության նախարարության իրավաբանական ինստիտուտ» ՊՈԱԿ-ը, Ծաղկաձորի քաղաքապետարանը, «Էկոլոգանոոսֆերային հետազոտությունների կենտրոն» ՊՈԱԿ-ը, ՀՀ կառավարությանն առընթեր պետական եկամուտների կոմիտեն, և այլն։ Գագիկ Ջանջուղազյանը հոդվածում նշվում է որպես ՓԲԸ-ի փաստացի տերերից մեկը:

Ինչպես հասկանում ենք՝ Նոր Հայաստանում Ջանջուղազյան եղբայներն իրենց վատ չեն զգում. մի եղբայրը շարունակում է Փաշինյանի ձեռքից բարձր պաշտոնների ստանալ, իսկ մյուսը, ըստ էության, բավականին լուրջ և ազդեցիկ դեր ունի գնումների ոլորտում: Հարց է առաջանում՝ Փաշինյանը իրո՞ք չի նկատում առկա կոռուպցիոն ռիսկը, թե պարզապես չի ցանկանում այն նկատել: Դատողությունները թողնում ենք ընթերցողին...