Անուշ Բեղլոյանին առաջիկայում լուրջ «քննություն» է սպասվում

«Քաղաքացիական պայմանագիր» խմբակցությունը Մրցակցության պաշտպանության հանձնաժողովի անդամի թափուր տեղի համար առաջադրել է պատգամավոր Անուշ Բեղլոյանի թեկնածությունը: Հիշեցնենք, որ Բեղլոյանը պատգամավոր էր ընտրվել նաև նախորդ գումարման խորհրդարանում՝ «Իմ քայլը» դաշինքի համամասնական ցուցակով:

Նոր պաշտոնում, եթե վերջինս, իհարկե, ընտրվի՝ ինչում չենք կասկածում, Բեղլոյանին մի շարք ուշագրավ փորձություններ են սպասվում: Բանն այն է, որ ժամանակին վերջինս հետաքրքիր և բավական սուր կարծիքներ է արտահայտել հայկական շուկայում առկա մի շարք տնտեսվարողների հակամրցակցային վարքի մասով: Դիցուք՝ 2016 թվականին լինելով «Հանրային հաղորդակցության լաբորատորիա» խորհրդատվական ընկերության տնօրեն նա հայտարարել էր, որ YandexTaxi ընկերության հակամրցակցային մուտքը հայկական շուկա պետք է քննարկման առարկա դառնա:

Բացի սա, Անուշ Բեղլոյանը ժամանակին աշխատել է Արմենտելում՝ ղեկավարել է հասարակայնության հետ կապերի բաժինը: Արմենտելը, իհարկե, այլևս չկա, սակայն կան ինչպես ասում են՝ իրավահաջորդները և արդյոք այս ոլորտում աշխատած անձը կարող է հետագայում անաչառ լինել տվյալ ոլորտում առկա խախտումներն արձանագրելիս:

Կամ մեկ այլ մտահոգություն, որ ժամանակին արտահայտել է Բեղլոյանը, հետաքրքիր է` այդ նույն մտահոգությունը` որպես ՄՊՀ անդամ, Բեղլոյանը կունենա՞, թե՞ արդեն իսկ փարատվել է:

ՔՊ-ական պաշտոնյաներին, ինչպես գիտենք, հաճախ պակասում է սկզբունքայնությունը, երբ վերջիններիս նախկինում և այսօր արված հայտարարությունները միմյանց ամբողջությամբ հակասում են: Այս առումով էլ հենց Բեղլոյանին բավականին լուրջ քննություն է սպասվում, կշարունակի՞ նա դուխով՝ ինչպես իրենք են ասում, բարձրաձայնել սուր խնդիրները, թե իրավիճակ է փոխվել և խոշոր տնտեսվարողներն արդեն իշխանությունների սրտի օլիգարխներն են...