Հայաստանը «աննկատ» լքած նախկին պաշտոնյաները. ովքե՞ր են «պլստացել» հեղափոխական արդարադատությունից

 

2019 թվականի հունվարի 17-ին առանձնապես խոշոր չափերով կաշառք ստանալու դեպքի առթիվ ՀՀ հատուկ քննչական ծառայությունում հարուցված քրեական գործով հետախուզում հայտարարվեց Արամ Հարությունյանի՝ Բուլկի Արամի նկատմամբ: Շուտով կլրանա 3-րդ տարին, սակայն Արամ Հարությունյանը չկա. իրավապահները փնտրում են։ Հեղափոխությունից հետո` 2019 թվականի հունվարի 24-ին, մի շարք աղմկահարույց քրեական գործերի հետ միասին նաեւ օֆշորային սկանդալի գործը վերաբացվեց ՀՔԾ-ում: Հեղափոխությունից 9 ամիս հետո նախաքննական մարմինը, ի դեմս ՀՔԾ-ի, հարցաքննության հրավիրեց Միհրան Պողոսյանին, սակայն նա այդպես էլ չեկավ հարցաքննության եւ այս օրերին ՌԴ-ում էր։ Ավելին, նա դիմել է ՌԴ-ին` քաղաքական ապաստան ստանալու խնդրանքով, ինչը բավարարվեց, եւ Միհրան Պողոսյանին ՌԴ-ն չտվեց ՀՀ իրավապահներին:

 

«Մարտի 1»-ի գործով հետախուզում է հայտարարված պաշտպանության նախկին նախարար Միքայել Հարությունյանի նկատմամբ: Տեւական ժամանակ իրավապահները չեն կարողանում Հայաստան բերել «Մարտի 1»-ի գործով մեղադրյալ, «Մարտի 1»-ի գործով քննչական խմբի նախկին ղեկավար Վահագն Հարությունյանին:

 

Հայտարարագրման ենթակա գույքը թաքցնելու եւ ապօրինի հարստանալու դեպքերի վերաբերյալ ՀՔԾ-ում քննվող քրեական գործի շրջանակներում 2018թ.-ին ծառայության քննիչի կողմից որոշում էր կայացվել` Լեւոն Սարգսյանին եւ վերջինիս դստերը` Անի Սարգսյանին, ՀՀ քրեական օրենսգրքի 310.1-րդ հոդվածի 1-ին մասով (ձեռնարկատիրական գործունեությանն ապօրինի մասնակցելը) եւ 314.3-րդ հոդվածի 2-րդ մասով (պաշտոնեական կեղծիքը) որպես մեղադրյալ ներգրավելու մասին: Նրա հանդեպ հետախուզում էր հայտարարվել, եւ որպես խափանման միջոցընտրվել էր կալանավորումը։ Սակայն, նրանց իրավապահները դեռ փնտրում են։

 

Մինչ իրավապահները զբաղված էին վերը նշված անձանց երկրից հեռանալու հանգմանքները պարզելով` Արագածոտնի մարզի նախկին դատավոր, Հոկտեմբերի 27-ի ոճրագործության գործը քննած դատավոր Սամվել Ուզունյանը լքեց երկիրը: Ի դեպ, օրերս հայտնի դարձավ, որ Ուզունյանը Հայաստանից հեռացել է քննիչներին կաշառելու միջոցով. հարուցվել է քրեական գործ, կան կալանավորված անձինք։ Հայաստան չի վերադարձել նաև բուժման նպատակով երկիրը լքած ` երկրորդ նախագահի մտերիմ գործարար Սամվել Մայրապետյանը։

 

2020 թվականի մարտի 20-ին հայտնի դարձավ, որ ՌԴ գլխավոր դատախազությունը բավարարել է Հայաստանի դատախազության միջնորդությունը՝ քրեական հետապնդման ենթարկելու նպատակով Հայաստան արտահանձնել հետախուզվող, մեղադրյալ, նախկին պատգամավոր, «Ալրաղացի Լյովիկ» մականունով հայտնի Լևոն Սարգսյանին։ Սակայն, Սարգսյանին արտահանձնելու գործընթացի մասին դեռևս որևէ տեղեկություն չկա։

 

Ուշագրավը սակայն միայն այն չէ, որ վերը նշված նախկին պաշտոնյաներին հաջողվել է իրավապահների և ՀՀ իշխանությունների քթի տակից ճողոպրել արտերկիր, թե ինչպես է դա նրանց հաջողվել` ակնարկել էր ԱԱԾ նախկին պետ Արթուր Վանեցյանը` առաջարկելով ՀՔԾ պետից (այն ժամանակ այդ պաշտոնը զբաղեցնում էր Սասուն Խաչատրյանը) հետաքրքրվել, թե ինչպես են վերջիններս լքել երկիրը: Ոչ պակաս ուշագրավ է նաև այն, որ հետախուզման մեջ գտնվողների բիզնեսների հանդեպ հեղափոխականները շարունակում են անչափ լոյալ գտնվել։  Դիցուք` միայն վերջերս հայտնի դարձավ որ պարեկային ոստիկանության ավտոմեքենաների համար ճաղավանդակները կառավարությունը ձեռք կբերի Մայրապետյանին պատկանող Տոյոտայից` վճարելով 21 միլիոն դրամ: Փետրվարին կառավարությունը արտոնություն տվեց «Մայլեռ Մաունթայն Ռեզորթ» ՓԲԸ-ին։ Ընկերության կանոնադրությունից պարզ է դառնում, որ ՓԲԸ հիմնադիրը «Միկշին» ՍՊԸ-ն է։ «Միկշին» ՍՊԸ-ի սեփականատերը Տիգրան Հարությունյանն է, որը Ազգային ժողովի նախկին պատգամավոր Վահան Հարությունյանի եղբայրն է, ԴԱՀԿ ծառայության նախկին պետ Միհրան Պողոսյանի քեռու՝ Միխայիլ Հարությունյանի որդին։ Ստացվում է՝ մի կողմից այս բիզնեսների հետ փոխկապակցված անձինք հետախուզվում են, իսկ մյուս կողմից իշխանությունները նրանց բիզնեսներին լավ աչքով են նայում, իսկ նշված հանգամանքն,, անշուշտ, չի կարող հարցեր չառաջացնել...