«Ազգ ու տակով» պաշտոնյաները. Ղալումյանն ու Փաշինյանը յուրացնում են Տավուշի մարզը
Վերլուծական
2018 թվականի իշխանափոխությունից հետո փորձագիտական շրջանակները լիահույս էին, որ կոռուպցիոն լուրջ ռիսկեր պարունակող «խնամի-ծանոթ-բարեկամ» ինստիտուտի կիրառումից պաշտոնյաները կհրաժարվեն՝ այն պատճառով, որ սա հեղափոխական իշխանության առանցքային խոստումներից էր: Նիկոլ Փաշինյանի հռչակած Նոր Հայաստանում, սակայն, «խնամի-ծանոթ-բարեկամ» ինստիտուտի ծիլեր նկատվում են, որոնք ամբողջությամբ տեղավորվում են, Փաշինյանի ձևակերպմամբ՝ «վարչապետի քիփը լինելու» տրամաբանության մեջ:
Դիցուք` 2018թ֊ի հայտնի դեպքերից հետո Տավուշում հաստատվեց Նիկոլ Փաշինյանի մանկության ընկեր-քավոր Վահե և Հայկ Ղալումյանների իշխանությունը, որոնք քաղաքապետ, ապա մարզպետ դարձան, պետական համակարգում տեղավորեցին իրենց ծանոթ բարեկամներին: Վերջինների թվին է դասվում նաև Իջևանի քաղաքապետ Արթուր Ճաղարյանը։
Ճաղարյանը, թերևս մարզպետի հորդորով համայնքապետարանում աշխատանքի է ընդունել Ղալումյանի բաջանաղի որդուն՝ Վաչե Վիրաբյանին։ Ապա Դավիթ Վիրաբյանի դուստրը՝ 19-ամյա Նանե Վիրաբյանն է հայտնվում ՔՊ ավագանու ցուցակում։ Մարզպետ Հայկ Ղալումյանին կարծես թե չեն բավարարել բաջանաղի ստացած հեղափոխական բոնուսները և արդեն ընտրված քաղաքապետ Արթուր Ճաղարյանին հրահանգել է առանց այդ էլ սուղ բյուջե ունեցող քաղաքում բացել քաղաքապետի տեղակալի երկրորդ հաստիք, որն, ըստ պտտվող լուրերի նախատեսված է, հենց բաջանաղին փոխքաղաքապետ կարգելու նպատակով։ Հայկ Ղալումյանը քաղաքապետարան է մտցրել նաև իր փեսայի եղբորը՝ Աշոտ Երիցյանին։
Հայկ Ղալումյանի եղբայրը՝ Վահե Ղալումյանը, նույնպես Փաշինյանի մանկության ընկերն է, որը պատգամավորական մանդատ է ստացել «Իմ քայլը» դաշինքից
Փաշինյանի դասընկերուհի Մանե Ղազումյանը նշանակվել է Տավուշի մարզի կրթության, մշակույթի և սպորտի վարչության պետի ժամանակավոր պաշտոնակատար։
Հայկ Ղալումյանը նաև անում էր ամեն հնարավորն ու անհնարինը, որպեսզի ԵՊՀ Իջևանի մասնաճյուղի տնօրեն նշանակվի իր ընկերը՝ շարքային դասախոս Հայկ Քամալյանը: «Ռաշն Վոյաժ» ՍՊԸ տնօրեն Վահագն Ղալումյանը, որը, կեղծելով բանկային երաշխիքը, մասնակցել է բազմաբնակարան շենքերի մուտքերի վերանորոգման մրցույթին, Հայկ Ղալումյանի հեռավոր բարեկամն է:
Նիկոլ Փաշինյանի կնքահայր Հայկ Ղալումյանի միջնորդությամբ Իջևանի անտառտնտեսության տնօրեն է նշանակվել իր ընկեր Մհեր Ղալթաղչյանը։
Տավուշի մարզպետ Հայկ Ղալումյանը ընդլայնել է իր այսպես ասած` ներկայությունը իշխանական համակարգում, ընդ որում գործը արդեն իսկ հասել է դատական համակարգին։ Մասնավորապես, 2022թ. հունվարի 13-ին Արթուր Աթաբեկյանը ՀՀ նախագահի՝ ՆՀ-13-Ա որոշմամբ նշանակվել էր սնանկության դատարանի նախագահ: Մամուլը գրել էր, որ Արթուր Աթաբեկյանը ԱԺ «Քաղաքացիական պայմանագիր» խմբակցության պատգամավոր Վահե Ղալումյանի եւ Տավուշի ներկայիս մարզպետ Հայկ Ղալումյանի հորաքրոջ որդին է։
Հավանաբար քչերը գիտեն, որ իշխանական պատգամավոր, Նիկոլ Փաշինյանի քավոր Վահե Ղալումյանն Իջեւանում` հեղափոխությունից հետո, ռեստորան է կառուցել: Այն կոչվում է «Ոսկե ձկնիկ»: Այնպես որ թավշյա հեղափոխությունը Ղալումյանների համար նաև բիզնես հաջողություններ է արձանագրել։
Իր ողջ քաղաքական կարիերայի ընթացքում ՀՀԿ բդեշխություններին քննադատող Փաշինյանը փաստորեն այսօր իր բդեշխությունն է կառուցել ի դեմս իր քավորի, քանի որ ակնհայտ է` չկա այնպիսի բարձր պաշտոն, որը զբաղեցրած չլինեն Ղալումյանի կամ Փաշինյանի մտերիմներն ու ընկերները։ Տպավորություն է, որ Տավուշի մարզում գործ ունենք բացահայտ կլանային դրսևորումների և իշխանության բոլոր լծակների յուրացման հետ։
ՈՒՂԻՂ ԵԹԵՐ
Ամենադիտված 
Մահացել է երգիչ Հովհաննես Գրիգորյանը
