Փաշինյանի թիմակիցները փչացրին նրա «փայլուն վիճակագրությունը»

ԱՄՆ Պետքարտուղարությունը հրապարակել է 2021 թվականի «Մարդու իրավունքների համաշխարհային զեկույցը», որում անդրադարձ կա նաև Հայաստանին։

Զեկուցում, մասնավորապես, նշվում է, որ հեռարձակվող լրատվամիջոցները, հատկապես՝ Հանրային հեռուստատեսությունը, մնում է բնակչության մեծամասնության համար նորությունների և տեղեկատվության հիմնական աղբյուրներից մեկը։ Լրատվամիջոցների որոշ ներկայացուցիչների կարծիքով՝ Հանրային հեռուստատեսությունը շարունակել է նորություններն ու քաղաքական բանավեճերը ներկայացնել իշխանամետ տեսանկյունից, թեև այն հասանելի է մնացել ընդդիմության համար: Նշվում է, որ Հանրային հեռուստատեսությամբ կողմնակալության դեպքերը հատկապես ակնհայտ էին նախընտրական շրջանում։ Հունիսի 20-ի արտահերթ խորհրդարանական ընտրությունների նախաշեմին մեդիա մոնիթորինգը ցույց է տվել, որ հատկացված եթերաժամանակի առումով հանրային հեռարձակողը ամենաքիչ ուշադրությունն է դարձրել հիմնական ընդդիմադիր ուժին («Հայաստան» դաշինք):

Ինչպես գիտենք` վերջերս Հ1-ի գործադիր տնօրեն է նշանակվել ֆեյքերի ՊՈԱԿ-ի նախկին տնօրեն Հովհաննես Մովսիսյանը, իսկ վերջինիս տեղակալն է Երևանի նախկին փոխքաղաքապետ Տիգրան Վիրաբյանը: Երկուսն էլ, կարելի է ասել, իշխանական թիմի ներկայացուցիչներ են: Ընդամենը մի քանի շաբաթ առաջ Փաշինյանը հպարտանում էր այն առիթով, որ Հայաստանի վերաբերյալ տարբեր հեղինակավոր միջազգային զեկույցներ աննախադեպ բարեփոխումներ են արձանագրում այս կամ այն ոլորտում և այդ առումով Հայաստանը ունի փայլուն վիճակագրություն: Ինչպես երևում է` Փաշինյանի թիմակիցները, որոնց վստահվել է հարկատուների հաշվին աշխատող Հանրայինը, փոքր-ինչ չափն անցել են «ջանասիրության» հարցում և արջի ծառայություն են մատուցել վարչապետին՝ փչացնելով վերջինիս հպարտության առիթ հանդիսացող «փայլուն ցուցանիշները»...