Բան Կի Մունը շնորհավորել է Ուսուցչի համաշխարհային տոնը

ՄԱԿ-ի գլխավոր քարտուղարն այսօր ուղերձ է հղել ուսուցիչների համաշխարհային օրվա առիթով։ Այս մասին տեղեկանում ենք ՄԱԿ-ի պաշտոնական կայքից։

«Ցանկացած կրթական համակարգի որակը չի կարող ավելի բարձր լինել, քան այդ համակարգում աշխատող ուսուցիչներինը։ Ուսուցիչները կրթության հոգաբարձուների դեր են կատարում, նրանք փոխանցում են գիտելիքներ, արժեքներ, ունակություններ. ամբողջությամբ գործադրելով իրենց ներուժը՝ նրանք հնարավորություն են տալիս երիտասարդներին իրականացնել իրենց նպատակները և օգտակար քաղաքացիներ դառնալ»։

Գլխավոր քարտուղարի խոսքերով`այնուհանդերձ, շատ հաճախ ուսուցիչները չեն գնահատվում ըստ արժանվույն։ Ուսուցչի համաշխարհային օրը մեզ համար հիշեցում է ծառայում մանկավարժների ծանր պարտականությունների, ինչպես նաև այն խնդիրների մասին, որոնց հետ նրանք առնչվում են հատկապես համաշխարհային տնտեսական խնդիրների պայմաններում։ Երեխաները և ուսուցիչները չպետք է տուժեն այդ ճգնաժամից։

«Ուսուցչի համաշխարհային օրը ես արժանին եմ մատուցում ամբողջ աշխարհի միլիոնավոր ուսուցիչներին, որոնք հետաքրքրությամբ և հմտությամբ աշխատում են իրենց աշակերտների դաստիրարակության ուղղությամբ՝ դրանով իսկ մեծ ազդեցություն ունենալով մեր աշխարհի վրա։ Մենք պետք է խոստովանենք, որ ներդրումներ անելով ուսուցիչների համար՝ մենք իմաստուն ենք վարվում, քանի որ դրանով իսկ ներդրում ենք անում հզոր տնտեսության, համախմբված հասարակության և հետագա աշխարհի կերտմանն ուղղված մեր ջանքերի մեջ, որտեղ բոլորը կկարողանան ապրել արժանավոր կերպով և ունենալ հավասար հնարավորություններ»։