Ո՞վ է ավելի մեծ թվով կոռուպցիոներների «ձեռք» բռնել

Նիկոլ Փաշինյանի կառավարությունը հեղափոխությունից հետո օգտագործում է բոլոր առիթները` հայտարարելու, որ հեղափոխական իշխանություններն օր ու գիշեր պայքար են մղում կոռուպցիայի դեմ և այդ հարցում աննախադեպ հաջողություններ են գրանցում: Սակայն, խոսենք թվերով: 2018թ. հունվար-հոկտեմբեր ամիսներին կաշառք ստանալու կամ կաշառքի միջնորդության համար հարուցվել էր 431 գործ: Ի տարբերություն 2019 թվականի` 2020-ին կոռուպցիայի դեմ պայքարը, մեղմ ասած, տապալվել է: 2020 թվականի ընթացքում ՀՀ իրավասու մարմինների վարույթում կոռուպցիոն բնույթի հանցագործությունների վերաբերյալ նախապատրաստվել է 1810 նյութ, իսկ  2019-ին ՝ 2083 նյութ: 1810-ից 1332-ով (2019-ին 1399) հարուցվել են քրեական գործեր, 516-ով  քրեական գործի հարուցումը մերժվել է: 

2009 թվականին 771 քրեական գործ է հարուցվել կոռուպցիոն հանցագործությունների մասով: 2010 թվականին այդ թիվը կազմել  է 895: 2011 թվականին՝ 913:  2012-ին՝ 830: 2013-ին՝ 1698: 2014-ին՝ 576: 2015թ. ընթացքում հարուցված կոռուպցիոն գործերի քանակն աճել է՝ կազմելով 1330 գործ: 2016 թվականին բացահայվել էր  կոռուպցիոն բնույթի 1187 գործ, 2017 թվականին` 767:

Ինչպես տեսնում ենք՝ կոռուպցիայի դեմ պայքարը դրոշակ դարձրած հեղափոխական իշխանություններն այնքան էլ հեռու չեն գնացել նախկիններից կոռուպցիոն բնույթի հանցագործությունները ֆիքսելու և բացահայտելու գործում...