Զարեհ Սինանյանն` ընդդեմ ՔՊ նախընտրական ծրագրի և Նիկոլ Փաշինյանի

Դիցուք, դեռևս ընդդիմադիր պատագմավոր եղած ժամանակ Նիկոլ փաշինյանը նշում էր, որ Հայաստանում հնարավոր չէ ներգաղթ այնքան ժամանակ, քանի դեռ չի եղել իշխանափոխություն, ավելին` նա Ազգային ժողովի ամբիոնից հայտարարում էր, որ մեծ հայրենադարձության կազմակերպումը քաղաքացիական պայմանագիր կուսակցության ծրագրային նպատակներից է: Եվ հետո այս թեզը շարունակեց նաև իշխանափոխության օրերին, իսկ արդեն իշխանություն գալուց հետո կրկին վստահորեն պնդում էր, որ հայերնադարձության մեկնարկը տրված էր: 2019 թվականի հոկտեմբերին Հայաստանի վարչապետ Նիկոլ Փաշինյանը ԱՄԷ «Gulf News» թերթին տված հարցազրույցում անդրադարձել է հարցին, թե ինչպիսի՞ն է արտագաղթի կանխարգելմանն ուղղված նոր տնտեսական քաղաքականությունը: Նա համոզմունք էր հայտնել, որ կառավարության քաղաքականությունը և տնտեսական հեղափոխությունը կխթանեն ներգաղթը:

 

Ի հեճուկս Փաշինյանի` ամիսներ առաջ Սփյուռքի հարցերով հանձնակատար Զարեհ Սինանյանն Ազգային ժողովում, ի պատասխան պատգամավորներից մեկի հարցին, նշեց, որ Հայաստանը պատրաստ չէ ներգաղթի: Ավելին՝ նշեց, որ հայրենադարձության խթանումն իրենց համար առաջնային խնդիր չէ:

 

Հայոց ցեղասպանության միջազգային ճանաչումը նշվել է, թե որպես ՔՊ, թե որպես կառավարության ծրագրի առաջնահերթություն։ Այս հարցի շուրջ բազմիցս է արտահայտվել ինքը` Նիկոլ Փաշինյանը։ Նա, մասնավորապես, ամեն առիթով հայտարարում է, որ Հայաստանը շարունակելու է ակտիվորեն նպաստել ցեղասպանությունների, մարդկության դեմ հանցագործությունների կանխարգելմանն ուղղված միջազգային հանրության ջանքերին, էթնիկ, կրոնական և ռասայական հողի վրա խտրականության և անհանդուրժողականության դրսևորումների դեմ պայքարին։ Այդ նույն ժամանակ Փաշինյանի կողմից նշանակված Սփյուռքի գործերով գլխավոր հանձնակատարը Ծիծեռնակաբերդում հայտարարում է, թե դեռ պետք է նայենք` մեզ ինչ է տալիս կամ տվել ցեղասպանության միջազգային ճանաչումը։

 

Շաբաթներ առաջ էլ Սփյուռքի գործերի գլխավոր հանձնակատար Զարեհ Սինանյանը ԱԺ-ում էր: Հանդիպման ընթացքում ԱԺ «Հայաստան» խմբակցության պատգամավոր Արեգնազ Մանուկյանը, դիմելով Զարեհ Սինանյանին, հիշեցրեց, որ դեռևս 2018 թվականին հայտարարվում էր, որ հեղափոխությունից հետո սփյուռքից հսկայական ներդրումներ են գալու Հայաստան և թռիչքաձև տնտեսական աճ է լինելու, հետևաբար՝ ո՞ւր մնացին ներդրումները և տնտեսական թռիչքաձև աճը։ Պատասխանելով հարցին՝ Զարեհ Սինանյանն ասաց, որ ճիշտ կլինի՝ հարցն ուղղվի «տնտեսության» նախարարությանը, քանի որ ներդրումների վերաբերյալ ինքը ստատիստիկ տվյալներ չունի հարցին լիարժեք պատասխանելու համար։ «Ես կարող եմ ընդհանուր խոսել, թե ինչ խնդիրներ կան ներդրումների հետ կապված։ Հայաստանում ներդրումների հետ կապված մենք ունենք խնդիր, երբ մարդիկ գալիս են ներդրումներ անելու, Կառավարության կամ բյուրակրատիայի տարբեր օղակների հետ դժվարությունների հետ են առնչվում։ Մարդիկ խնդիրներ ունեն ամենատարրականից մինչև ամենամեծ, սա հիասթափեցնում է մարդկանց»,- նշեց Զարեհ Սինանյանը։ Ուշագրավ է, որ սա թերևս առաջին դեպքն էր, երբ Սինանյանը նման բացահայտ կեպրով բոչկա է գլորում Նիկոլ Փաշինյանի վրա, քանի որ կառավարություն ասելով՝ հենց նրան էլ բնականաբար նկատի ունի: Իսկ այդ նույն ժամանակ Նիկոլ Փաշինյանը, հղում անելով ՔՊ նախընտրական ծրագրում առկա խոստումների իրականացմանը, հայտարարում է, որ Հայաստան են գալիս աննախադեպ ծավալի ներդրումներ։

 

Ինչպես տեսնում ենք` շատ և շատ առանցքային հարցերում Զարեհ Սինանյանի և իր անմիջական ղեկավարի կարծիքները չեն համընկնում, մնում է հասկանալ` ինչպես է այդ դեպքում պաշտոնյային վստահվում կառավարության ծրագրում իր ոլորտի մասով առկա ծրագրերի իրականացումը, եթե վերջինս բացահայտ սաբոտաժի է ենթարկում դրանք։