Թավշյա հեղափոխության հայտնի «դեմքերը» երես են թեքել Նիկոլ Փաշինյանից

Հեղափոխության օրերին համացանցում և կայքերի առաջին էջերում հայտնվող հայտնի ակտվիստների կյանքում էական փոփոխություններ են տեղի ունեցել:

Իշխանափոխության օրերին արագաչափ սարքից իր ներքնազգեստը կախելով հայտնի դարձած, այնուհետև Սփյուռքի նախարարությունում պաշտոն ստացած և այն ժամանակ Նիկոլ Փաշինյանի ջատագով Անուշ Լալայանը լքել է Հայաստանը և բնակություն հաստատել Նիդերլանդներում: Ոչ վաղ անցյալում «Մերժիրսերժին» և «Իմ քայլը» քաղաքացիական նախաձեռնությունների անդամ Լալայանը Ֆեյսբուքի իր էջում հայտնել է, որ այսուհետ ապրելու է Ամստերդամում:

Նշենք, որ 44-օրյա պատերազմից հետո Լալայանը հանդես էր գալիս հակաիշխանական գրառումներով` քննադատելով վարչապետ Նիկոլ Փաշինյանին և նրա թիմին: «Կարող եք Նիկոլին, նախընտրական տեքստերը գրելուց առաջ, ուղղակի հիշեցնել, որ 3 տարի պետության ղեկին ոչ ես եմ եղել, ոչ Դոնլդ Դակը, ոչ Միկի Մկնիկը, ոչ էլ առավել ևս Դորիս ձկնիկը: Նա է իր սեփական ուժերով մսխել հեղափոխությունը, նա է տանուլ տվել պատերազմը, նա է իր թեթև ձեռքով Քոչարյանին բերել դարձրել իր համար առաջին հակառակորդ՝ չեզոքացնելով այլ հավանական ուժերի գոյությունը»,- նման գրառում էր կատարել նա՝ կից դնելով «վստահություն մսխողը» հեշթեգը։ 

2018 թվականի «թավշյա հեղափոխության» օրերին Անի Հակոբջանյանը ԵՊՀ բանասիրական ֆակուլտետի երրորդ կուրսի ուսանող էր: Նա հիշվեց այդ պայքարում ոչ միայն իր ակտիվ մասնակցությամբ, այլեւ՝ յուրահատուկ ոճով. նա հեղափոխության հայտնի մեծ «բանտիկով» աղջիկն էր:

«Հիմա փոշմանում եմ, որ մասնակցել եմ, բայց, ամեն դեպքում, կարծում եմ՝ ինչ-որ քայլ էր, որ պետք է անեինք: Ուղղակի դրանից հետո պետք է ավելի ուշադիր լինեինք մեր բերած մարդկանց, այսինքն՝ եթե ինչ-որ մարդիկ մեր շնորհիվ եկել են իշխանության, պետք է ավելի ուշադիր լինեինք, որ այնպես կառավարեն, ինչպես այդ օրերին էին խոստանում»,-այժմ ասպես է ասում Անի Հակոբջանյանը:

Հեղափոխության օրերին իր ակտիվությամբ աչքի ընկած, այնուհետև պետական պաշտոն զբաղեցրած Գևորգ Աճեմյանը նույնպես հեռացել է ՔՊ-ից և սկսել է քննադատել Փաշինյանի վարած քաղաքականությունը` հեղափոխությունը անվանելով ֆեյք:

2018-ին, երբ հեղափոխությունը սկսվեց եւ Նիկոլ Փաշինյանը սկսեց իր քայլարշավը դեպի Երևան, մի շարք կարգախոսներ էր օգտագործում, դրանցից մեկը՝ «Քա՛յլ արա»-ն էր։ Զուգահեռ ստեղծվել էր նաեւ «Մերժի՛ր Սերժին» անունով նախաձեռնություն, որի անդամներն էին արդեն երկրորդ անգամ Անվտանգության խորհրդի քարտուղար նշանակված Արմեն Գրիգորյանը, Փաշինյանի ՔՊ ցուցակով պատգամավորներ դարձած Մարիա Կարապետյանը, Թագուհի Ղազարյանը և այլք։

Հեղափոխության սկզբում այս նախաձեռնությունը միացավ Նիկոլին, որից ծնվեց հայտնի «Քա՛յլ արա, մերժի՛ր Սերժին» կարգախոսը, որը եւ դարձավ հեղափոխության տրաֆարետը, իսկ նախաձեռնությունը կարեւոր դերակատարում ունեցավ իշխանափոխության հարցում։ Կարգախոսի հեղինակը Դավիթ Հովհաննիսյանն էր, ով պարզվում է այժմ Նիդերլանդներից քաղաքական ապաստարան է խնդրում:

Antifake.am-ը գրել էր, որ կառավարության շենքի դիմաց ամիսներ առաջ ակցիա իրականացնողներից Էդգար Բաբայանը իր նորածին դստերը Նիկոլ Փաշինյանի պատվին անվանել է  Ռուզաննա Նիկոլ։ Էդգար Բաբայանը, 15 տարուց ավելի Մոսկվայում բնակվելով, հայրենիք է վերադարձել ապրիլ-մայիսյան հայտնի իրադարձությունների ֆոնին։

Չնայած Փաշինյանին շարունակաբար գովաբանելուն և նրա ընդդիմախոսներին հայհոյելուն՝ Էդգար Բաբայանը վերջին շրջանում նաև նկատել է վարչապետի «թերությունները» և որոշ ծաղրական հրապարակումներ արել։

Ինչպես տեսնում ենք՝ հեղափոխության օրերին թավիշ քարոզող և նախկիններին մերժող ակտիվիստների մոտ լուրջ փոփոխություններ են նկատվում: Այս մարդիկ 2018-ին համարվում էին հեղափոխության դեմքերը, նրանց մասին էին խոսում և գրում բոլոր լրատվամիջոցները, իսկ այսօր վերջիններս հրապարակավ հայտարարում են, որ չորս տարի առաջ սխալվել են և քննադատում են այն անձին, որի կողքին 2018-ին բողոքի ակցիաներ էին իրականացնում՝ մերժելով Սերժին...