Հերթը հասավ Հարություն Փամբուկյանի՞ն

ՀՀ հակակոռուպցիոն կոմիտեում քննվող քրեական գործի նախաքննությամբ ձեռք բերված բավարար ապացույցների համակցությամբ հիմնավորվել է, որ ՀՀ քաղաքաշինության, տեխնիկական և հրդեհային անվտանգության տեսչական մարմնի Կոտայքի տարածքային բաժնի պետի տեղակալի պաշտոնը զբաղեցրած Պ. Ե.-ն ու նույն բաժնի գլխավոր մասնագետի պաշտոնը զբաղեցրած Ա. Գ.-ն կազմակերպության օգտին ակնհայտ ապօրինի անգործության համար նախնական համաձայնությամբ ստացել են խոշոր չափերով կաշառք:

Ուշագրավն այն է, որ հաղորդագրության մեջ նշվում է նաև այն ընկերության անվանումը, որից նշված պաշտոնյաները կաշառքը ստացվել են: Խոսքը «ԿամՕյլ» ՍՊԸ-ի մասին է: «Հետք» պարբերականը ժամանակին անդրադարձ կատարելով Հայաստան ավիավառելիք ներկրող ընկերություններին` ֆիքսել էր, որ «ԿամՕյլ» ՍՊ ընկերության տնօրենը Կամո Մելքոնյանն է, ով նաև «Մաքս Օյլ» ընկերության տնօրենն է: Այսպիսով, ավիավառելիք ներմուծող առնվազն երկու ընկերություն փոխկապակցված են նախկին ՀՀԿ-ական պատգամավոր Հարություն Փամբուկյանին: Ինչպես գիտենք՝ «Մաքս Օյլ»-ը պատկանում է հենց նրան:

Ստացվում է` իշխանությունների ձեռքը հասավ նաև Փամբուկյանին, իսկ սխեման, ինչպես ասում են, պարզ է: Կարելի է ենթադրել, որ այս կամ այն չափի գումար մուծվելուց հետո ՍՊԸ-ի տնօրենի նկատմամբ քրեական գործը պարզապես կկարճվի, կամ ինչպես ասում են՝ չեն հասնի ավելի վերևներին: Օրինակ` գրեթե նույն պատկերը եղավ «ՖԼԵՇ» ՍՊԸ-ի դեպքում, երբ քրեական գործ էր հարուցվել ՍՊԸ-ի տնօրենի դեմ, իսկ դրանից հետո «ՖԼԵՇ»-ը աչքի ընկավ տարակուսելի առատաձեռնությամբ՝ «Իմ քայլը» հիմնադրամին որպես նվիրատվություն փոխանցելով 5 միլիոն դրամ:

Ինչպես ասում են՝ իշխանությունների ձեռագիրը չի փոխվում...